УИХ-ын Халдашгүй байдлын дэд хорооны дарга Ц.Сандаг-Очир: УИХ-ын гишүүн Д.Цогтбаатарыг эгүүлэн татна

Хөгжлийн банкны гэх хэргийн Хяналтын шатны шүүх хурлын шийдвэр гарч тухайн үед Хөгжлийн банкны хэлтсийн захирлаар ажиллаж байсан, одоогийн УИХ-ын гишүүн Д.Цогтбаатарыг албан тушаалын байдлаа ашиглан бусдад давуу байдал олгосон гэм буруутай гэж үзсэн анхан шатны шүүхийн шийдвэрийг хэвээр үлдээсэн. Ингэснээр Д.Цогтбаатар гишүүний бүрэн эрхийн асуудал хөндөгдөөд байгаа юм. Энэ талаар УИХ-ын гишүүн, Халдашгүй байдлын дэд хорооны дарга Ц.Сандаг-Очироос тодрууллаа.

- УДШ-ийн шийдвэрээр УИХ-ын гишүүн Д.Цогтбаатарын бүрэн эрхийн асуудал хөндөгдөж байна. Үүнийг яаж шийдэх вэ?

- Халдашгүй байдлын Дэд хорооны даргын хувьд албан ёсоор байр сууриа илэрхийлэхэд Улсын дээд шүүхийн шийдвэрийг хараагүй байна. Шүүхийн шийдвэр УИХ-ын Тамгын газарт албан ёсоор ирсэн эсэхийг ч мэдэхгүй байна. Та бүхэнтэй адилхан олон нийтийн сүлжээний мэдээлэлтэй байна. Үнэхээр Дээд шүүхийн шийдвэр эцэслэн гарсан бол Үндсэн хуулийн заалтаар бол энэ нь эцсийн шийдвэр. Дээд шүүхийн шийдвэрийг бүх шатны шүүх бусад этгээдүүд заавал биелүүлэх үүрэгтэй. Тэгэхээр наад асуудал чинь Халдашгүй байдлын дэд хорооны авч хэлэлцэх асуудал биш шууд эргүүлэн татах асуудал хөндөгдөнө. Дээд шүүх шийдвэрээ УИХ-д ирүүлснээр Төрийн байгуулалтын байнгын хороогоор хэлэлцэгдэх учиртай. Манай Халдашгүй байдлын байнгын хороонд хамаагүй.

- УИХ-ын гишүүн халдашгүй дархан эрхтэй гэдэг үүднээс танай Байнгын хороо асуудлыг хөндөх болов уу гэж асууж байгаа хэрэг?

- УИХ-ын гишүүн байлаа ч Дээд шүүхийн шийдвэрийг давж заалдах эрхгүй шүү дээ. Заавал биелүүлэх л үүрэгтэй.