Төсвийн мөнгөөр төрсөн өдрөө тэмдэглэгч

УИХ-д 5 удаа сонгогдсон Ховд нутгийн эрхэм гишүүн С.Бямбацогтыг нам дотроо чамгүй нөлөөтэй нэгэн гэдэг. Нэг гартаа улс төр, эрх мэдэл нөгөө гартаа бизнес, хөрөнгө мөнгө атгачихсан олигархи цөөхөн гишүүдийн нэг тэрээр иймдээ ч байнга шахуу давхар дээл “угладаг” нь бараг хэвшил зуршил мэт болсон. Ямартаа л Батлан хамгаалахын сайдын суудлаа буруу харж уйлж, зөв харж инээж авсан гэх яриа хэсэг саарал ордноор хэсүүчилсэн. Угтаа мань хүний амбиц, шунал Эрчим хүч юм уу Зам тээвэр хавьцаа байсан юм байх. Учир нь түүний бизнес дээрх салбаруудтай салшгүй холбоотой.

Нийслэлийн утаа ужгирсан энэ өдрүүдэд улсын Ерөнхийлөгч УИХ, Засгийн газрын гишүүдийг дуудан авчирч “загнаж” байх хооронд манай сайд үсэрч гарч ирэн баахан хэвлэлийнхнийг жагсааж байгаад Ерөнхий сайд аятай мэдээлэл өгсөн нь саяхан. Батлан хамгаалахын сайдад утаа ямар өнцгөөрөө, яахаараа ч хамаатай болчихдог юм, бүү мэд. Ер нь энэ цагаас хойш С.Бямбацогт сайдын хувийн пиар илт эрчимжсэн. Үүнийг харсан олон нийт түүнийг Ерөнхий сайдын суудалд санаархаж  байна гэж “дүгнэсэн”.

Тэгвэл өнөөдөр 50 насны ойн баяраа төсвийн 7 сая төгрөгөөр тэмдэглэх гэж байсан нь баримтаар дэлгэгдэж, гууль нь цухуйлаа. Тодруулбал, Батлан хамгаалах яамны Төрийн нарийн бичгийн дарга Б.Ганхуяг тушаал гаргаж тус яамны сайдаас эхлээд мэргэжилтэн хүртлэх 5 хүний төрсөн өдрийг тэмдэглэн өнгөрүүлэх тухай тушаал гаргаж, төсөв баталсныг www.ulsturch.mn сайт дэлгэсэн. Тушаалын агуулга нь 50 нас хүрсэн хүн бүрт тус бүр 1.4 сая төгрөгийн үнэ бүхий мөнгөн аяга бэлэглэх. Харин угийн мэлзэж сурсан манай сайд би мөнгөн аяга аваагүй хэмээн цахим хуудсаараа хээвнэг мэдээлж сууна.

Авсан байна уу, аваагүй  байна уу гэдэгт асуудал байгаа юм биш. Хамгийн гол нь төрийн мөнгөөр төрсөн өдрөө тэмдэглэж суудаг анхны яам, анхны сайдаар С.Бямбацогт тодорч, түүхэнд нэрээ үлдээх нь ээ. Төр, төсвийн мөнгө уйлдаггүйн нэг жишээ юм даа.

Х.Бумаа