Тусгай үүрэгт Элчин сайдууд ба албан тушаалын гэмт хэрэгтнүүд

Л.Оюун-Эрдэнийн засаг өдрөөс өдөрт данхайсаар байгаагийн нэг тод жишээ бол ҮАБЗ-д ажиллаж байсан Ерөнхийлөгч, Ерөнхий сайд нарыг тусгай үүрэгт Элчин сайдаар томилох болсон явдал. Энд хачирхалтай хоёр өнцөг байгаа юм. Нэгдүгээрт, эдгээр Элчин сайдууд Монгол Улсыг аль нэг улсад төлөөлж ажиллаж амьдрахгүй харин Засгийн газрын хэрэгжүүлэхээр төлөвлөж буй 14 мега төслийг хэрэгжлүүлэхэд Ерөнхий сайд болон Засгийн газарт зөвлөж ажиллана. Зуун ямаанд 60 ухнын үлгэр.

Хоёрдугаарт, эдгээр Элчин сайдуудын тал нь авилга, албан тушаалын хэргээр аавын хаалга татаж байсан “гэмт хэрэгтнүүд” байгаа юм. Хамгийн дуулиантай нь Монгол Улсын Ерөнхийлөгч асан Н.Энхбаяр бол хамгийн сүүлд ял, зэм асуулгасан нь Ерөнхий сайд асан Ж.Эрдэнэбат. Саяхан эрүү, шүүлт тулгаж явсан Монголын төр өнөөдөр Элчин сайд хэмээх эрхэм чухал эрх, ямбыг өгч буй нь чухам ямар утгыг илэрхийлнэ вэ? Монгол төр байтугай монгол хүн бөөлжсөн бөөлжсөө буцааж залгидаггүй гэдэг бардам хүн чанартай биш билүү.

Эсвэл дээрх эрхмүүдийг төрийн нэрийн өмнөөс улс төрийн агуулгаар хэлмэгдүүлж байсан юм уу? Түүнийхээ өршөөлийг эрж ийн эрх ямба, алба тушаал өгч байгаа юм уу?

Эсвэл ерөөс Монгол төр хулгайч, луйварчдын орогнож бүгдэг газар болчихсон юм уу гэж эрхэм Ерөнхий сайд Л.Оюун-Эрдэнээс асуумаар байгаа юм.

Монгол Улсын Дипломат албаны тухай хуулийн дагуу Элчин сайд нь төрийн тусгай албан хаагч бөгөөд Монгол Улсын Ерөнхийлөгч томилж, эгүүлэн татдаг. Элчин сайдын зэрэг, цол зарим улс оронд ялгаатай онцлог байх хэдий ч олон улсын нийтлэг хэрэглэгдэх "Онц бөгөөд Бүрэн эрхт Элчин сайд" гэсэн гуншинг дэлхий даяар хэрэглэсээр ирсэн.  Элчин сайд нь аливаа нэг улс оронд эсвэл олон улсын байгууллагын дэргэд суухаас гадна тодорхой нэг асуудлаар буюу онцгой үүрэг хүлээсэн албан тушаалтанг "Тусгай үүрэг гүйцэтгэгч Элчин сайд" гэж нэрлэх нь бий хэмээн тов тодорхой заажээ.

Гэтэл эрхэм Ерөнхий сайд хээвнэг энэхүү томилгоог хийх болсон шалтгаан нь үе үеийн Ерөнхийлөгч, Засгийн газрын тэргүүн, УИХ-ын дарга нар мега төслүүд дээр шат дараатай тогтоол оруулж, хэлэлцүүлж батлуулж байсан туршлагатай учраас тусгай үүрэгт Элчин сайдаар томилж байгаа юм гэж байгаа юм.

Тэнэг хүнийг тэнгэр ивээнэ гэгчээр мега төслүүд хэмээх гоё үгийг Л.Оюун-Эрдэнийн чихэнд ямар ч чөтгөр шивнэчихсэн юм. За тэгээд амьдралдаа нэг ТҮЦ ч ажиллуулж үзээгүй хүнд нэг төсөл ажил ч болов мега түвшинд харагддаг ч юм билүү, хэн мэдлээ. Монгол төрийн дээр 4 дэх жилдээ лаглайтал сууж буй тэрээр суудал, сэнтийдээ хэрхэн олон жил шигдэх вэ гэж ухаан сийлэхдээ бодож олсон нэг схем нь тусгай үүрэгт Элчин сайдууд хэмээх гоё нэртэй, төр, төсвийг данхайлгасан энэхүү томилгоо болж байна. Тэрээр, би л энд сууж байвал бусад нь падгүй, гэмтэн, гэгээнтэн хэн ч бай бүгдээрээ нэг хөнжилдөө амар сайхандаа жаргая гэдэг дээр цайрчихлаа.        

• 1. Монгол Улсын Ерөнхийлөгч, Ерөнхий сайд, УИХ-ын дарга асан Н.Энхбаяр

  

Намбарын Энхбаяр. Монгол Улсын Ерөнхийлөгч, Ерөнхий сайд, УИХ-ын дарга буюу төрийн гурван өндөрлөгт гурвууланд нь заларч явсан цорын ганц улс төрч. УИХ-ын гишүүнээр тасралтгүй 4 удаа сонгогдон ажилласан, П.Жасрайн Засгийн газарт Соёлын сайдаар ажиллаж байсан гэх мэт улс төрчийн уртын урт намтартай.

Түүний Монголын төрд байгуулсан ганц гавьяа бол Ерөнхий сайдаар ажиллаж байхдаа хойд хөрштэй “тулж” ажилласны хүчинд ЗХУ-ын үед үүссэн “шилжих рублийн” өрийг тухайн үеийн ОХУ-ын Ерөнхий сайд Михаил Касьяновтой тохиролцон нийт өрийн 95 хувийг тэглүүлсэн явдал. Энэ тохиролцоог хийж чадаагүй бол тухайн үед манай улс 250 сая америк долларын өрийг төлөх төлбөрийн чадваргүй байсан.

Тэгвэл түүний үйлдсэн гэм нүгэл юу байв?

2012.04-р сард АТГ-аас Монгол Улсын Ерөнхийлөгчөөр ажиллаж байхдаа албан тушаалын байдлаа урвуулан ашиглаж улсад онц их хэмжээний хохирол учруулсан гэх хэрэгт буруутган сүр дуулиант баривчилгааг зохион байгуулж байв. Экс Ерөнхийлөгч өөрт нь улс төрийн хилс хэрэг тулгаж байна хэмээн эсэргүүцэн Хорих 461-р ангид цагдан хоригдож байх үедээ буюу 2012 оны 5-р сард хуурай өлсгөлөн зарлаж улмаар түүний биеийн байдал эрс муудаж 2-р эмнэлэгт нэн яаралтайгаар эмчилгээнд хамрагдаж байв.

Түүнийг цагдан хорьсноос хойш 5 сарын дараа буюу 2012 оны 9-р сард шүүх хуралдаан болж Монгол Улсын Ерөнхийлөгчөөр ажиллаж байх үедээ эрх мэдэл албан тушаалын байдлаа урвуулан ашиглаж  улсад онц их хэмжээний хохирол учруулсан, онц их хэмжээний хөрөнгө завшсан гэм буруутай гэж үзэн анхан шатны шүүхээс 4 жилийн хорих ял, 25 сая төгрөгийн эд хөрөнгийг хураахаар шийдвэрлэсэн. Эцэст нь 2012 оны 12-р сард Улсын Дээд шүүхийн Хяналтын шатны шүүх хуралдаан болж түүнд холбогдох хэргээс ТВ9 телевиз болон, Ган бөмбөлөгийн хэргийг хэрэгсэхгүй болгож ялын хэмжээг 2.6 жил болгон хөнгөрүүлсэн.

2013 оны 8-р сард Ерөнхийлөгч асан Ц.Элбэгдорж түүнд уучлал үзүүлж, суллагдсан.

• 2. Монгол Улсын Ерөнхий сайд асан М.Энхсайхан

  

Монгол Улсын 18 дахь Ерөнхий сайд М.Энхсайхан. 1996 онд УИХ-ын ээлжит сонгуульд АН ялалт байгуулснаар түүнийг Ерөнхий сайдаар томилсон. Энэ үеэс эхлэн Засгийн газрын дундаж насжилт 1.7 жил болсон түүхтэй.

Түүний хувьд Ерөнхий сайдаар ажиллах хугацаандаа төрийн мэдэлд байсан орон сууцыг иргэдэд үнэ төлбөргүй хувьчилж өгсөн түүхэн том гавьяатай. Мөн ажлын 6 өдөр байсныг 5 өдөрт шилжүүлсэн, цахилгаан, дулааны үнийг чөлөөлсөн, өмч хувьчлалыг нээлттэй ил тод болгохоор дуудлага худалдаа зохион байгуулж эхэлсэн зэрэг нийгэм, эдийн засгийн олон реформыг М.Энхсайханы Засгийн газар хийж хэрэгжүүлсэн байдаг.

Харин дээрх үйлдлүүд нь хамтран зүтгэгчдэд нь таалагдаагүй юу, 1998 онд огцруулсан. Огцорсон шалтгаан нь их хошин. Ерөнхий сайдын албыг “Намын дарга хаших” ёстой гэсэн дүрмээс үүдэлтэй. Харин өнөө үед ялсан намын дарга Ерөнхий сайд болно гэсэн өгүүлбэрийг бүх улс төрийн нам, намын үндсэн дүрмэндээ тусгасан билээ.

Тэгвэл түүний үйлдсэн гэм нүгэл юу байв?

2015 онд Тавантолгойн нүүрсний орд газрыг хөгжүүлэх талаар авах арга хэмжээний тогтоолын төслийн хүрээнд байгуулагдсан гэрээ боловсруулах ажлын хэсгийн ахлагчаар ажиллаж байхдаа Тавантолгой төслийн хөрөнгө оруулагчийг шалгаруулах явцад нөлөөлж, албан тушаал эрх мэдлээ урвуулан ашиглан зарим компанид эдийн засгийн давуу эрх мэдэл олгосон гэм буруутай, хорлон сүйтгэх үйл ажиллагаа явуулсан гэж үзэн 2020 оны 5-р сард шүүхээс 4.6 жилийн хорих ялаар шийтгэсэн. Түүнийг ялаа эдэлж байх хугацаанд буюу 2021 оны 8-р сард Ерөнхийлөгч У.Хүрэлсүх зарлиг гаргаж  уучлал үзүүлснээр суллагдсан.

1. 3. Монгол Улсын Ерөнхий сайд асан Р.Амаржаргал

   

Монгол Улсын 21 дэх Ерөнхий сайд Р.Амаржаргал.

УИХ-ын гишүүнээр 4 удаа сонгогдсон бөгөөд хоёр дахь удаагаа сонгогдохдоо УИХ-ын сонгуульд бие даан нэр дэвшин сонгогдож байжээ. Түүний хувьд 1998 онд М.Энхсайханы Засгийн газар огцорсны дараа Ц.Элбэгдоржийн Засгийн газарт Гадаад хэргийн сайдаар томилогдон ажилласан.

1999 оны 7-р сараас 2000 оны 7-р сар хүртэл 1 жилийн хугацаанд Монгол Улсын Ерөнхий сайдын албыг хашсан.

Ерөнхий сайдаар ажиллах хугацаандаа банк, санхүүгийн системийн өөрчлөлтийг хийж чадсан нь тухайн үеийн эдийн засгийн хүндхэн нөхцөл байдлыг даван туулах чухал шийдвэр байсан юм.

• 4. Монгол Улсын Ерөнхий сайд, УИХ-ын дарга асан М.Энхболд

  

Магадгүй намтар түүх, адал явдал ихтэй Элчин сайдын нэгт М.Энхболд бичигдэнэ. Учир нь ердөө 6 жилийн өмнө өнөөгийн Ерөнхий сайд Л.Оюун-Эрдэнэ өөрийн гараар түүнийг Засгаас түлхэн унагаж байв.  

Тэрээр УИХ-ын гишүүнээр 4 удаа сонгогдсон. Анх 2005 онд УИХ-ын нөхөн сонгуульд нэр дэвшин ялалт байгуулж, УИХ-д хөл тавьсан. Түүнээс хойш тасралтгүй 3 удаа УИХ-ын гишүүнээр сонгогдсон.

2006.01-2007.11-р сар хүртэл Ерөнхий сайдаар томилогдон ажилласан.

Тэрээр өөрийн Засгийн газраа “Үндэсний эв нэгдэл”-ийн Засгийн газар хэмээн нэрийдэж, Ерөнхий сайдаар ажиллах хугацаандаа хот руу нүүдэллэх их нүүдлийг зогсоохын тулд төвлөрөлийг сааруулах чиглэлээр тодорхой хэмжээнд ажилласан төдийгүй цалингийн доод хэмжээг огцом нэмэгдүүлсэн зэрэг чухал шийдвэрүүдийг гаргаж байсан.

2016.07-р сараас 2019.01-р сар хүртэл УИХ-ын даргаар ажилласан.

2017 оны Ерөнхийлөгчийн сонгуульд нэр дэвшин өрсөлдсөн ч Х.Баттулгад ялагдан өвдөг шороодсон нь түүний улс төр төдийгүй нам доторх нөлөөг сулруулсан. Ингээд 2019 оны 1-р сард  одоогийн Ерөнхий сайд Л.Оюун-Эрдэнээр ахлуулсан “Шударга тав” гэх УИХ-ын нэр бүхий 5 гишүүн Сүхбаатарын тайлбайд жагсаал цуглаан хийж түүнийг УИХ-ын даргын үүрэгт ажлаа өгөхийг тулган шаардсан. Улмаар Ерөнхийлөгч Х.Баттулгын дэмжлэгтэйгээр УИХ-ын тухай хуульд нэмэлт өөрчлөлт оруулах замаар УИХ-ын даргын албан тушаалаас нь буулгаж, улс төрийн карерыг нь дуусгаж байсан түүхтэй. Тэр цагаас хойш гэртээ бүгсэн түүнд чухам нэгэн цагт карьерыг нь дуусгаж байсан “сайн дүү” нь тусгай үүрэгт Элчин сайдын албан тушаал бэлэглэж байгаа нь чухамдаа хувь заяаны шоглоом гэлтэй. Гэхдээ Миеэ даргад эл томилгоо, урилга ямар сэтгэгдэл төрүүлж буйг таахад бэрх.

• 5. Монгол Улсын Ерөнхий сайд С.Баяр

  

Монгол Улсын 25 дахь Ерөнхий сайд С.Баяр.

Түүний байгуулсан гавьяа бол 20 жилийн турш уналтад ороод байсан газар тарилангийн салбарт “Атрын 3-р аян”-ыг өрнүүлсэн, анхны мега төсөл Оюутолгойг хөдөлгөсөн хэмээх хоёр том үйл явдал хоёулаа өнөөгийн тэлж томорсон эдийн засгийн анхдагч шалтгаан болсон гэхэд хилсдэхгүй.

УИХ-ын сонгуульд ялалт байгуулсан намын дарга дангаараа Засгийн газраа бүрдүүлдэг тогтсон жишгийг анхлан эвдсэн С.Баяр 2008 онд сөрөг хүчин АН-д хамтарсан Засгийн газар байгуулах санал тавьсанаар өөрийнх нь хэлсэнчлэн анхны стандарт бус Засгийн газар байгуулагдсан түүхтэй. Чухэм энэ үед алдарт Оюутолгойн хөрөнгө оруулалтын гэрээ /2009 онд/ үзэглэгдэж энэ гэрээ, энэ төслийн ачаар Монгол Улс эдийн засгийн үсрэнгүй хөгжилтэй золгосон гэж болно. Гай, гавьяа хоёрыг нь тэрээр адил тэнцүү үүрч яваа.

Түүний үйлдсэн гэм буруу юу байв?

2018 оны 4-р сард Оюутолгойн гэрээтэй холбогдуулан С.Баярыг АТГ-аас баривчилсан. Мөн л эрх мэдэл, албан тушаалын байдлаа урвуулан ашигласан гэж үзэн 2020 оны 4-р сард шүүхээс 5 жилийн хорих ялаар шийтгэсэн. Улмаар Нийслэлийн давж заалдах шатны шүүхээс 2.6 жил болгон бууруулсан.

Ингээд хуулийн дагуу ялынхаа хагасыг биеэр эдэлсэн тул үлдсэн хорих ялыг магадлангаар оруулж, 2021 оны 7-р сард сулласан. Өөрөөр хэлбэл С.Баяр бусад шигээ уучлал, өршөөлд хамрагдаагүй, ялаа эдлээд гарч ирсэн гэсэн үг.

• 6. Монгол Улсын Ерөнхий сайд С.Батболд

  

УИХ-ын гишүүнээр 6 удаа улиран сонгогдсон туршлагатай улс төрч.

2009 оны 10-р сард Монгол Улсын Ерөнхйи сайдаар томилогдсон. Тэрээр С.Баярын Засгийн газрын үед эхлүүлсэн Оюутолгойн гэрээний үр шимээр анх удаа Монгол Улсын эдийн засаг 17 хувьд хүрч тэлсэн үед Засгийг тэргүүлсэн азтай Ерөнхий сайд.

Мөн өөрийн мэдэлд байсан  Тавантолгойн бүлэг ордын ашиглалтын тусгай зөвшөөрлийг төрд эргүүлэн өгсөн нэг гавьяатай. Ингэснээр Тавантолгойн бүлэг орд газар эдийн засгийн эргэлтэд орж байв. Тус орд газар эдийн засгийн эргэлтэд орсноор өнөөдөр Монголчууд бид Тавантолгойн бүлэг орд газраас 1072 хувьцаа эзэмших замаар хувь хишиг хүртсээр байгаа билээ.

С.Батболдын хувьд улс төрд хөл тавихаасаа өмнө “Алтай трейдинг” групптэй, өмч хувьчлалаас ч хувь хишиг хүртэж дөнгөсөн сүйхээтэй бизнесмэн байсныг мартаж болохгүй. Бороогийн алтны уурхайг гадныхантай хамтран олборлож дуусгасан ял зэмийг ч түүнд нааж болох талтай.

• 7. Монгол Улсын Ерөнхий сайд Ж.Эрдэнэбат

  

Монгол Улсын 29 дэх Ерөнхий сайд Ж.Эрдэнэбат.

УИХ-ын гишүүнээр 3 удаа сонгогдсон. 2014 онд Ч.Сайханбилэгийн Засгийн газрын үед Сангийн сайдаар анх томилогдож гүйцэтгэх засаглалын бүрэлдэхүүнд багтаж байсан.

2016 оны 7-р сараас 2017 оны 9-р сар хүртэл Ерөнхий сайдаар томлогдон ажилласан. Түүнийг Ерөнхий сайдаар ажиллах үед манай улсын эдийн засаг огцом уналтад орсон улс төрийн хүндхэн цаг үеийг туулж гарсныг дурдах нь зүй.

Ерөнхий сайдаар ажиллаж байх хугацаандаа  "Олон Улсын Валютын сангийн хөтөлбөр"-ийг хэрэгжүүлж, нийгмийн халамжийн чиглэлээр олон чухал шийдвэр гаргасан нь өнөө ч үр дүнгээ өгсөөр буй. Тухайлбал, Ахмад настнуудад "Насны хишиг" олгох хуулийг санаачлан хэрэгжүүлсэн, "Цалинтай ээж", "Элэг бүтэн Монгол" зэрэг  томоохон Үндэсний хөтөлбөрүүд, Улаанбаатар-Налайх чиглэлийн хоёр урсгалтай автозам, Дархан-Улаанбаатарын автозамуудыг шинэчлэн барих ажлын төсөв санхүүжилтийг олон улсаас босгосон гэх мэтээр богино хугацаанд хийж, хэрэгжүүлсэн ажил ихтэй Ерөнхий сайд.

Цаашилбал, Улаанбаатар хотын агаарын бохирдлыг бууруулах хамгийн үр дүнтэй шийдвэрүүд энэ Засгийн газрын үед эхэлсэн буюу шөнийн цахилгааны тарифыг тэглэж, бага оврын зуухуудыг буулган төвлөрсөн системд холбох зэрэг бодит ажлуудыг эхлүүлсэн гавьяатай.  

Тэгвэл гэм буруу юу байв ?

2020 оны УИХ-ын сонгуулийн сурталчилгаа эхэлсэн 6-р сарын 13-ны өдөр баривчлагдаж, торны цаана суусан, түүгээр ч барахгүй хоригдож байхдаа УИХ-д сонгогдсон Монголын анхны улс төрч. Мөн л эрх мэдэл албан тушаалын байдлаа урвуулан ашигласан гэх үндэслэлээр буруутгаж, 2020 оны 7-р сард шүүхээс 6 жилийн хорих ялаар шийтгэсэн.

Ж.Эрдэнэбатын эл кэйс тухай үедээ УИХ-ын сонгуулийн тухай хуулийг ноцтой зөрчсөн төдийгүй УИХ-ын гишүүний халдашгүй байдалд халдсан ноцтой үйлдэл хэмээгдэж байсан билээ.

Тэрээр хоригдож байх хугацаандаа анхан болон давж заалдах шатны шүүхийн шийдвэрийг эсэргүүцэн УДШ-д гомдол гаргаснаар хэрэг нь прокурорт буцсан. Прокуророос хэргийг дахин мөрдөн байцаалтад буцааснаар 2021 оны 3-р сард батлан даалтаар суллагдсан. Энэ үедээ УИХ-ын гишүүний тангаргаа өргөснөөр холбогдсон хэрэг нь түрдээ намжсан.

• 8. ҮАБЗ-ийн Нарийн бичгийн дарга А.Гансүх

  

Тусгай үүрэгт Элчин сайдууд дундах тоон доторх үсэг. Өөрөөр хэлбэл А.Гансүхийн хувьд төрийн гурван өндөрлөгт ажиллаж байгаагүй. Экс Ерөнхийлөгч Х.Баттулгын үед ҮАБЗ-ийн Нарийн бичгийн даргаар ажиллаж байсан гэдгээрээ эл томилгооны тойрогт багтаж байгаа юм уу даа.

Хуульч мэргэжилтэй А.Гансүх улс төрийн хүрээнд анх 2008 онд Зам тээвэр, барилга хот байгуулалтын дэд сайдын албан тушаалд томилогдсноор орж ирсэн. Н.Алтанхуягийн Засгийн газрын бүрэн эрх хэрэгжиж байсан үе бөгөөд Зам тээвэр, барилга хот байгуулалтын сайдаар “Женко” Х.Баттулга ажиллаж байв. Энэ үеэс тэднийг  “хамтрагчид” болсон гэж болно.

Тиймдээ ч А.Гансүхийг 2017 онд Х.Баттулга Ерөнхийлөгчөөр сонгогдосныхоо дараа ҮАБЗ-ийн Нарийн бичгийн даргаар томилж байв. Нэг үгээр энэ удаагийн тусгай үүрэгт Элчин сайдын албанд А.Гансүхийг Женко Х.Баттулга түлхсэн байх магадлалтай.

Тэрээр мөн л авилга, албан тушаалын хэргээр аавын хаалга татсан нэгэн.

2017 онд Зам тээврийн сайдаар ажиллаж байхдаа эрх мэдэл, албан тушаалын байдлаа урвуулан ашигласан гэж үзэн эрүүгийн хэрэгт татан шалгаж эхэлсэн. Эл хэрэгтэй нь холбогдуулан түүнийг 2022 онд Монгол Улсын хилээр гарахыг нь хориглож ч байсан удаатай.

А.Гансүхийн холбогдсон хэрэг үүгээр дуусахгүй. Түүнийг хэргээ наймаалцсан, террорист ажиллагаа явуулахыг завдсан гэмт хэрэгт буруутган 2022 оны 8-р сард холбогдох хэргийг шүүх рүү шилжүүлсэн байдаг ч өнөөдрийг хүртэл нэг нь ч шийдэгдээгүй. Холбогдсон хэргүүд нь ээлж дараалан прокурорт, мөрдөн байцаалтад эргэж буцсаар өнөөг хүрсэн байдаг.

ТОЙРГИЙН ГАДНА ҮЛДЭГДСЭД

Тусгай үүрэгт Элчин сайд нарыг томилохдоо ҮАБЗ-д багтаж байсан хүмүүс хэмээн тодотгосон. Тэгвэл энэ тодорхойлолтод багтах Ерөнхийлөгч асан Н.Багабанди, Ц.Элбэгдорж, Х.Баттулга, УИХ-ын дарга асан Д.Дэмбэрэл, Д.Лүндээжанцан, Ц.Нямдорж, З.Энхболд  Ерөнхий сайд асан Н.Алтанхуяг, Ч.Сайханбилэг нар тусгай үүрэгт Элчин сайдын томилгооны тойрогт багталгүй үлдэж байгаа юм.

Тэгвэл Ерөнхийлөгч асан Н.Багабанди гавьяаныхаа амралтыг эдэлж буй. Ерөнхийлөгч асан Ц.Элбэгдоржийг тусгай үүрэгт Элчин сайдаар томилох нь бүү хэл “шувуу” болсныг Ерөнхий сайд Л.Оюун-Эрдэнэ мэдэгдээд буй.

Женко Х.Баттулгын тухайд УИХ-ын гишүүнээр дахин сонгогдсон тул хуулийн дагуу давхар албан тушаал хаших боломжгүй.  

Харин УИХ-ын дарга нарын тухайд авч үзвэл Д.Дэмбэрэл хэт өндөр настай бол Д.Лүндээжанцан, Ц.Нямдорж нарын хувьд хууль боловсруулж явснаас биш мега төсөлд гар бие оролцож яваагүй улс. Харин З.Энхболдын тухайд байж болох хувилбар ч энэ удаад тойргийн гадна үлдлээ.

Ерөнхий сайд нараас Н.Алтанхуяг УИХ-ын тухай хуулийн дагуу Засгийн газрын гишүүн л биш бол өөр давхар албан тушаал хаших боломжгүй. Харин Ч.Сайханбилэгийн тухайд аль эрт эх орноосоо дүрвэж зугтаан “шувуу” болоод байгаа билээ.

Х.Бумаа