"Камертон"-ынхон төрсөн өдрөөрөө фенүүддээ мэндчилэв
1995 оны зургаадугаар сарын 24-нд Хөгжим бүжгийн коллежийн сурагч дөрвөн хүүгийн үүсгэн байгуулсан "Камертон" хамтлагийн 29 жилийн ой өнөөдөр тохиож буй. Эл баярт өдрөөрөө тус хамтлагийнхан фенүүддээ талархал илэрхийлжээ.
"Камертон" хамтлагийн ахлагч, Төрийн соёролт, дуучин, продюсер Д.Болд:
Өнөөдөр 6 сарын 24 ний өдөр…
"Ямар ч үед нэг нэгнийгээ орхихгүй байж,ямар ч үед "Camerton" гэсэн энэ эгшиг аялгууг таслахгүй шүү" гэсэн тангараг тавьж 1995 оны 6-р сарын 24-ний өдөр Хөгжим бүжгийн дунд сургуулийн шатны буланд дөрвүүлээ гар гараа атган, сэтгэл зүрх,тус тусын мөрөөдлүүдээ нэгтгэн байгуулсан хамтлаг минь өнөөдөр 29 нас хүрлээ…
Газар дээрх цор гурван найздаа түүх бүтээсэн өдрийн мэнд хүргэе!
Одоог хүртэл бидний дуу хөгжимтэй хамтдаа амьдарч байгаа үзэгчид, үнэнч фэнүүддээ баярын мэнд хүргэе!
БАЯРЛАЛАА "КАМЕРТОН"
Өнөөдөр "Камертон" хамтлаг маань 29 нас хүрч байна. Бидэнтэй 29 жил хамтдаа дуулж, бүжиглэж, халуун алга ташилт, урам зориг бэлэглэж байдаг үзэгч сонсогчид та бүхэндээ болон хайртай ГУРВАН найздаа баярын мэнд хүргэе.
Өнөөдөр 6-р сарын 24-ны өдөр. Хуучнаар Хөгжим бүжгийн дунд сургуулийн шатны хажууд дөрвөн хүүхэд уулзаад, хичээл тарсныхаа дараа дөрвөн хоолойгоор анхныхаа дууг дуулснаар "Камертон" хамтлаг маань байгуулагдсан юм. Өглөө 9 цагт цуглаад хоолойнхоо бэлтгэлийг хийгээд, орой автобус зогсохоос өмнө гэртээ харьдаг байлаа. Бид дөрөв өөрсдийнхөө зорилго мөрөөдлийн төлөө зүтгэсээр л байгаа. Зарим нь биелсээн. Бидний өмнө хийх юм зөндөө байна. Бид чадна гэдэгтээ ч итгэлтэй байгаа. Яагаад гэвэл
Бидэнд Д.Болд хаашаа ч нугарахгүй юманд тууштай даацтай, бодлоготой үнэнч хамтлагийн ахлагч байгаа.
Бидэнд Б.Эрдэнэбат бүдрэхэд минь түшиж, болохгүйг минь шүүмжилж, замыг минь тэгшитгэдэг, ямар ч айдасгүйгүйгээр урагшаа амьдрах итгэлийг минь өгдөг анд минь байна.
Бидэнд Г.Мэнд-Амар алхахад хөрс, амьсгалахад агаар, уухад ус, гэрэлтдэг нар шиг, дааруулахгүй өлсгөхгүй өвдүүлэхгүй анд минь байна.
Бидэнд тэнгэр бурхнаас илгээсэн ариун сайхан хань ижил, сахиусан тэнгэрүүд минь байна.
Бидэнд "Camerton" зовоход жаргахад ,уурлахад инээхэд, энэ хорвоод юу ч тохиолдсон бидэнтэй хамт байх үнэнч сонсогч нар маань байна.
Тийм болохоор би ийм аз жаргалтай тайван ирээдүйдээ итгэлтэй та нараараа бахархаж амьдардаг юм даа.
"Камертон"-ынхондоо 29 жилийн төрсөн өдрийн баярын мэнд хүргэе.
