"Inside out-2" хүүхэлдэйн кино 1 тэрбум ам.долларын орлого олжээ

“Дисней” болон “Пиксар” студийн хамтран бүтээсэн “Inside out-2” хүүхэлдэйн кино өнгөрсөн зургадугаар сарын 14-нд нээлтээ хийсэн. Келси Манны найруулсан тус уран бүтээл нь кино театруудаар гарч эхэлсэн хоёр долоо хоногийн хугацаанд 1 тэрбум гаруй ам.долларын орлого олоод байна. Тодруулбал, 200 сая ам.доллароор бүтээсэн эл кино нээлтээ хийснээсээ хойш Хойд Америкт 469.3 сая ам.долларын орлого олсон бол дэлхий даяарх орлого нь 1.015 тэрбум ам.долларт хүрчээ. Ингэснээр энэ онд нээлтээ хийсэн кинонуудаас тэрбумын орлого олсон эхний кино болж буй юм. Мөн энэ үзүүлэлтийг давсан бүх цаг үеийн 11 дэх хүүхэлдэйн кино болжээ. Сонирхуулахад, тус хүүхэлдэйн киноны эхний ангийг Пит Доктер найруулж, 2015 онд үзэгчдийн хүртээл болгож байсан бөгөөд дэлхийн кино театруудаас 859 сая ам.долларын орлого олж байжээ.