Ардын жүжигчин Л.Цогзолмаагийн 100 насны ойг тэмдэглэнэ

Монгол Улсын Хөдөлмөрийн баатар, Ардын жүжигчин, Зууны манлай сайхан эмэгтэй Л.Цогзолмаа 100 нас хүрч байна. Лувсанжамцын Цогзолмаа нь 1924 онд Төв аймгийн Угтаал-Цайдам суманд төржээ. Тэрбээр 1940 онд Урлагийн сургуулийн жүжигчний ангид орж 1942 онд төгссөн байна. Ингээд улсын циркт жаз хөгжимчин, төв театрт дуучин, жүжигчнээр ажиллаж байв. Мөн 1957-1961 онд МУИС анх удаа мэргэжлийн найруулагчийн анги нээхэд элсэж төгсжээ.

Өдгөө 100 насалж буй Л.Цогзолмаа 1945 онд "Цогт тайж" киноны түвдийн гүнж Дулмаа, 1956 онд "Манай аялгуу" дуучин, 1979 онд "Бушхүүгийн үлгэр" киноны Наран ээж дүрүүдийг бүтээж, кино урлагт мөнхөлсөн юм. 

Түүнд 1945 онд БНМАУ-ын гавьяат жүжигчин, 1951 онд БНМАУ-ын Маршал Чойбалсангийн нэрэмжит шагнал, 2001 онд МУ-ын Ардын жүжигчин, 2007 онд МУ-ын Хөдөлмөрийн баатар цол хүртээсэн байна.