Хуурамч шатахуун үйлдвэрлэдэг "Трафигура"-гийн Э.Жононбаяр толгой компаниасаа 5 жилийн турш $1.1 тэрбумын луйвар хийжээ
Монголын төрийг Цэцтэй нь, Их хуралтай нь худалдаж авсан “Трафигура” гэх эрх мэдэлтэй компанийн тухай та эрх биш сонссон байх. Энэ компанийг Э.Жононбаяр гэдэг залуу удирддаг бөгөөд компаниараа дамжуулан Монголдоо керосин, нафта татваргүй оруулж ирж холиод хуурамч шатахуун, дизель түлш үйлдвэрлэдэг зартай нэгэн. Тэрбээр 2012 оны нэгдүгээр сард “Трафигура”-гийн Монгол дахь захирлаар томилогдож байжээ. Үүнээс хойш хуурамч шатахууны бизнесээ дэлгэрүүлсэн гэхэд хилсдэхгүй.
Тэгвэл Монголын нийт шатахууны зах зээлийн 20 гаруй хувийг эзэгнэж, нефтийн завсрын бүтээгдэхүүний импортоор ноёрхлоо тогтоодог Э.Жононбаяр толгой компаниасаа таван жилийн турш 1.1 тэрбум ам.доллар залилсан болох нь тогтоогджээ.
Тодруулбал, Сингапурт төвтэй "Трафигура" үндэстэн дамнасан корпораци санхүүдээ аудит оруулсны дүнд Монголд газрын тосны бүтээгдэхүүн нийлүүлэх бизнесийн үйл ажиллагаанаасаа 1.1 тэрбум ам.долларын зөрчил илрүүлжээ. Үүнээс гадна толгой компаниас илүү мөнгө нэхэмжлэх, хугацаа хэтэрсэн авлагыг зориудаар нуун дарагдуулах гэх мэт ноцтой гэмт хэрэг үйлдэгдсэнийг тогтоосон байна. Энэ талаарх мэдээллийг өнгөрсөн наймдугаар сард хохирлын хэмжээ хэдэн зуун, зуун сая ам.долларт хүрсэн гэдгийг хэлж байсан юм. Харин энэ удаад хохирлын хэмжээ тэрбум ам.доллараас давсан болохыг тогтоож, албан ёсны цахим хуудастаа өчигдөр нийтэлжээ. Тус мэдэгдэлд, "Санхүүгийн шалгалтын дүнд уг гэмт хэрэг таван жилийн турш үйлдэгдэж ирснийг тогтоосон гээд илэрсэн 1.1 тэрбум ам.долларын ихэнх нь Монгол дахь үндсэн түншид хамаатай" гэжээ.
Тэгвэл "Трафигура Монголиа" компанийн эзэн Эрдэнэсүрэн, түүний хүү Э.Жононбаяр нар эл гэмт хэргийг үйлдсэн болох нь ил болоод байгаа юм. Энэ хэрэгт Э.Жононбаярын ээж, нагац ах, нагац эгч, хүргэн ах нар нь ч мөн өөрсдийн нэр дээрх 22 компани болох “Трафигура монголия”, “Трансгайд сервис”, “Хөрс ойл”, “Петро ойл трейд”, “Даймонд ойл”, “Зууннайм ойл”, “Аргал ойл”, Трансгайд терминал”, “Ист-Ойл”, “Тод петролиум” гэх мэт компаниудаараа дамжуулан залилан хийжээ. Түүнчлэн тэдний ард Ерөнхий сайд асан С.Баяр, Эдийн засгийн хөгжлийн сайд асан Ч.Хүрэлбаатар, Гэр бүл, нийгэм хамгааллын сайд Л.Энх-Амгалан, УИХ-ын гишүүн Ц.Цэрэнпунцаг болон Т.Бадамжунай тэргүүтэй нөлөө бүхий хүмүүс холбоотой байдаг гэлцэж байв.
