УИХ-ын гишүүн Х.Тэмүүжин: Ерөнхий сайд сая “Гаднын тусгай албадын оролцоо явсан” гэдэг том дүгнэлт хийлээ.

УИХ-ын чуулганаар “Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах чиглэл батлах тухай” тогтоолын төслийг хэлэлцэж байна.

Энэ үеэр УИХ-ын гишүүн Х.Тэмүүжин Ерөнхий сайд сая “Гаднын тусгай албадын оролцоо явсан” гэдэг том дүгнэлт хэлчих шиг боллоо. Гол нь популизмыг галзууруулсан. Бид асуудалд бодитой хандаж чадахаа байсан. Дараа нь төр галзууртлаа данхайсан. Гуравт, хуулийн байгууллагад сорилт бий болсон. Тогтолцооны авлига бол гаарчихсан шүү дээ. ҮХЦ өөрөө оролцож, ийм дүгнэлт гаргасан нь тогтолцооны авлигын сонгодог жишээ.

ҮХЦ-ийн гишүүн бүрэн эрхээ өгсөн ч үхэн үхтэл нь хуулийн байгууллага шалгаж болохгүй гэдэг хуулийг оруулж ирсэн шүү дээ. Ингэтлээ галзуурсан байхгүй юу. Бид өнөөдөр ард нь үүнээс бий болсон үр дагавруудаа арилгах талаар бодох ёстой. Хулгай хийдэг өндөр түвшний албан тушаалтнуудад хууль очиж үйлчилж чадах эсэхээ одоо ярья.

Хоёрт, 16 жилийн төрийн данхайлтаа буулгах юм уу гэдгээ ярилцъя.

Гуравт, үнэхээр популизмгүйгээр Монгол Улсын төлөө шийдвэр гаргаж чадах эсэхээ ярилцъя. Тэгэхгүй бол нөгөө тусгай албад, нөгөө олигархиуд, нөгөө улстөрийг худалдан авдаг систем амьд байгаа. Энэ системээ янзлахгүй бол энэ 16 жил дахиад л үргэлжилнэ” гэлээ.