2020-2024 оны парламентад дахин сонгогдоогүй 38 гишүүнээс 30 нь “тэтгэмж“ авах хүсэлтээ гаргаж, эхний сарын тэтгэмжээ авсан байна

УИХ-ын гишүүнд 38-46 сая төгрөгийн тэтгэмж олгох хуулийн заалт сүүлийн үед олны шүүмжлэл дагуулаад байна.

Тодруулбал, УИХ-ын тухай хуулийн 41.9-д “Хэрэв гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж … олгоно” гэж заасан... 1997 оны УИХ-ын тухай хуульд "дахин сонгогдоогүй гишүүнд 6 сарын цалинтай тэнцэх хэмжээний тэтгэмж олгох"-оор заасныг 2006 оны хуулиар 12 сар болгон өөрчилснөөс хойш 2020, 2024 оны хуульд хэвээрээ туссан УИХ-ын Ерөнхий нарийн бичгийн дарга (ЕНБД) Б.Баасандоржоос өчигдөр тодруулахад “126 гишүүний 81 нь анх удаа сонгогдсон.

Дахин сонгогдоогүй бүх гишүүн УИХ-ын гишүүний бүрэн эрх нь дуусгавар болсны дараа олгодог тэтгэмжийг аваагүй. Энэ тэтгэмжийг авахдаа өөрөө өргөдлөө өгдөг бөгөөд 10 гаруй гишүүнд олгосон” хэмээсэн. Гэтэл УИХ-ын ЕНБД Б.Баасандорж өнөөдөр хэвлэл мэдээллийн байгууллагуудад өгсөн ярилцлагадаа “Өмнөх 76 гишүүнтэй УИХ-д ажиллаж байгаад бүрэн эрх нь дуусгавар болсон 30 орчим гишүүн УИХ-ын гишүүний тэтгэмж авсан” гэв.

УИХ-ын ЕНБД Б.Баасандорж тэтгэмж авсан УИХ-ын гишүүдийн тоог хоёр өдрийн зайтай хоёр өөрөөр мэдээлж, олон нийтийг төөрөгдөлд орууллаа...