Боловсрол, соёл, шинжлэх ухаан, спортын байнгын хорооны хуралдаан боллоо

Боловсрол, соёл, шинжлэх ухаан, спортын байнгын хорооны хуралдаанаар Дээд боловсролын тухай хуулийн хэрэгжилтийн талаарх Боловсролын сайдын мэдээллийг сонсож, “Боловсролын багц хуулийн хэрэгжилтийг эрчимжүүлэх ажлын хэсэг” байгууллаа.

Уг ажлын хэсгийг УИХ-ын гишүүн Г.Дамдинням ахалж, бүрэлдэхүүнд нь УИХ-ын гишүүн Д.Бум-Очир, О.Батнайрамдал, С.Эрдэнэбат, О.Саранчулуун, Б.Хэрлэн, Н.Алтаншагай нар ажиллана. Боловсролын сайд П.Наранбаярын танилцуулснаар, Монгол Улсад 35 их сургууль, 29 дээд сургууль, 2 коллеж үйл ажиллагаа явуулж байгаа бөгөөд 150282 суралцагч, 11403 багш ажилчид ажиллаж байна. 2024-2025 оны хичээлийн жилээс боловсролын олон улсын стандарт ангилал /ISCED-2011,13/ дахь 416 мэргэжлийн хөтөлбөр, индексээр мэргэжилтэн бэлтгэж, төрийн өмчийн 6 их сургуульд гадаадын нэр хүнд бүхий судлаач, эрдэмтдийг урьж ажиллуулах ажлыг бодлогоор дэмжиж 120 орчим гаднын багш, судлаачдыг ажиллуулж, дэлхийн түвшний их сургуультай хамтын ажиллагааны гэрээ байгуулан, бакалавр, магистр, докторын түвшинд хамтарсан хөтөлбөр хэрэгжүүлэхээр ажиллаж байна. Мөн төрийн өмчийн их сургуулийн нийт хичээлийн 20 хүртэлх хувийг англи хэлээр заах бодлогыг хэрэгжүүлж эхэлжээ.

Түүнчлэн тэргүүлэх болон эрэлттэй мэргэжлийн чиглэлээр хөтөлбөрүүдийн элсэлтийг нэмэгдүүлж, суралцагчдад тэтгэлэг олгох, тэргүүлэх мэргэжлээр төгсөгчийг ажилд авч буй компанид татварын хөнгөлөлт үзүүлэх зэрэг урамшууллын бодлогыг дэмжиж ажиллаж байна гэлээ.

Тэргүүлэх болон эрэлттэй мэргэжлийн чиглэлээр суралцагчид олгох сургалт, судалгааны тэтгэлэгт 9.6 тэрбум, төрийн өмчийн дээд боловсролын сургалтын байгууллагын эзэмшиж, ашиглаж байгаа хөрөнгийн төрийн өмчийн тогтмол зардалд 13 тэрбум, дээд боловсролын сургалтын байгууллагын эрэмбэ тогтооход 100 сая, Засгийн газрын шийдвэрээр шинээр байгуулагдсан их дээд сургуулийн дэргэдэх хүрээлэнгүүдийн үйл ажиллагааны татаасанд 1.8 тэрбум төгрөгийг улсын төсвөөр санхүүжүүлж байна гэж Боловсролын сайд танилцуулгадаа дурдав. Боловсролын сайдын мэдээлэлтэй холбогдуулан УИХ-ын гишүүн Д.Рэгдэл, Д.Бум-Очир, Ж.Галбадрах, С.Эрдэнэбат, О.Батнайрамдал, Ч.Ундрам, О.Саранчулуун, Б.Хэрлэн, Н.Алтаншагай, Г.Дамдинням нар тодруулж, санал хэллээ.