Мэргэжлийн сумогийн 74 дэх аварга Хоошёорюү С.Бямбасүрэн

Мэргэжлийн сумогийн 2025 оны нэгдүгээр сарын Хацү башёд түрүүлсэн Хоошёорюү С.Бямбасүрэнд өнөөдөр ёкозүна цолыг албан ёсоор олголоо.

Тэрбээр өнгөрсөн башёд 13 даваатай үзүүрлэсэн бол энэ удаа 12 даваатай түрүүлнээр 74 дэх аварга болох болзлоо хангасан. Үүний дараа Сумогийн холбооны Ёкозүнагийн зөвлөл хуралдаж, ес гишүүний 100 хувийн саналаар түүнийг ёкозүна болохыг дэмжсэн. Зөвлөлийн хурлаар шүүмжлэл гарсан ч эцсийн мөчид эсэргүүцэх хүн байгаагүй аж. Улмаар Удирдах зөвлөл ч дээрх шийдвэрийг хүндэтгэн үзэж байгаагаа илэрхийлснээр өнөөдөр өглөө Хоошёорюү С.Бямбасүрэнг 74 дэх ёкозүнагаар албан ёсоор баталж, цолыг нь олголоо.

Холбооноос Сакайгава болон Оонарүто ояката нарыг элч төлөөлөгч болгон илгээсэн бөгөөд Тацүнами ояката гэргийн хамт угтан авчээ. Хоошёорюү холбооны шийдвэрийг сонсоод “Талархан хүлээн авч байна. Ёкозүнагийн нэр хүндийг унагаахгүй, сэвтүүлэхгүйгээр хамаг сэтгэл, хүчээрээ тууштай хичээн зүтгэх болно. Өнөөдөр та бүхэнд их баярлалаа” гэжээ.

Мэргэжлийн сумо бөхийн 74, Монголын зургаа дахь аваргаар тодорсон Хоошёорюү 2018 оны нэгдүгээр сараас мэргэжлийн сумод барилдаж эхэлсэн. Улмаар 2019 оны нэгдүгээр сард жюүрёо, 2020 оны Намрын тэмцээнд дээд зиндаанд дэвшсэн. Өнгөрсөн жилийн Нагоя башёд түрүүлээд озэки цол хүртэж байлаа. Тэр мэргэжлийн сумод 42 башё барилдан ёкозүна болов. Хоошёорюүгийн энэ амжилт нь түүхэнд зургаадугаарт орох хурдан үзүүлэлт юм. Өөрөөр хэлбэл, ийм богино хугацаанд ёкозүна цол хүртсэн зургаа дахь бөх болжээ. Харин түүний ах Асашёорюү Д.Дагвадорж 25 башёд барилдан аварга болсон билээ.

Монгол хүн Японы үндэсний бөх болох сумогийн дохёд 1992 оны Харү башёд анх хөл тавьсан цагаас хойш 33 жилийн түүхэнд монголчууд зургаа дахь ёкозүнагаа өлгийдөн авлаа. “Тацүнами” дэвжээний бөх Хоошёорюү С.Бямбасүрэнд ёкозүна цол олгох асуудлыг ердөө наймхан минутад шийдсэн байна. Түүний хувьд 12-3 гэсэн даруухан үзүүлэлтээр түрүүлсэн нь чөдөр болж байсан ч хоёр нэмэлт барилдаанд ялалт байгуулсан амжилтыг нь зөвлөлийн гишүүд өндрөөр үнэлжээ.