Баян-Өлгий аймгаас бүсчилсэн хөгжлийн уулзалтыг эхлүүлнэ

Бүсчилсэн хөгжлийн Үндэсний хорооны 2025 оны анхны хуралдаан өнөөдөр Төрийн ордонд боллоо.

Хуралдаанд Үндэсний хорооны гишүүд, Шадар сайдын ажлын алба болон 21 аймгийн Засаг дарга, аймгийн Хөгжлийн бодлого, төлөвлөлт, хөрөнгө оруулалтын хэлтсийн мэргэжилтнүүд цахимаар оролцов. Хуралдааны дараа Шадар сайд С.Амарсайхан тус хуралдаанаас гарсан шийдвэрийн талаар мэдээлэл хийсэн юм. Уг хуралдаанаар Бүсчилсэн хөгжлийн Үндэсний хорооны өнгөрсөн оны үйл ажиллагааны төлөвлөгөөний биелэлт, Бүсчилсэн хөгжлийн Үндэсний хорооны энэ оны үйл ажиллагааны төлөвлөгөөний төслийн танилцуулга, Бүсийн хамтын ажиллагааг дэмжих, идэвхжүүлэх хөдөлгөөн өрнүүлэх, олон талт арга хэмжээ зохион байгуулах тухай танилцуулгыг хэлэлцэн баталжээ.

Түүнчлэн Бүсчилсэн хөгжлийн зөвлөлдөх уулзалтыг гуравдугаар сараас орон нутагт зохион байгуулахаар тогтсон. Эхний уулзалтыг Баян-Өлгий аймгаас эхлүүлэх бөгөөд Засгийн газрын гишүүд бүрэн бүрэлдэхүүнээр оролцож, бүс нутгийн хөгжлийг эрчимжүүлэхэд чиглэсэн төсөл хөтөлбөрүүдийг иргэд, олон нийтэд танилцуулах аж.

Шадар сайд энэ үеэр хэлэхдээ аймаг, орон нутагт болох тэдгээр уулзалтыг өргөтгөсөн зөвлөгөөн хэмээн ойлгох хэрэгтэй хэмээн тодотгосны зэрэгцээ 2025 оныг Бүсчилсэн хөгжлийн үйл ажиллагааг бодитоор хэрэгжүүлсэн жил болно гэлээ.