УИХ-ын гишүүн Ч.Лодойсамбуу сарын 7 саяын түрээстэй “Bella Vista” хотхонд 2022 оноос хойш амьдарч байгаа гэв

УИХ-ын гишүүн Ч.Лодойсамбуу Ерөнхий сайд Л.Оюун-Эрдэнийг огцруулах албан бичиг боловсруулж, УИХ-ын гишүүдээс гарын үсэг цугуулж эхэлсэн талаараа өнгөрсөн Баасан гарагт мэдээлж улс төрийн гол дүрээр тодроод буй.

Улмаар өнөөдөр УИХ-ын гишүүн Ч.Лодойсамбуугийн гэрийн хаяг, орон сууцны талаарх мэдээлэл цахим сүлжээнд тарж эхэлсэн. Үүнтэй холбоотойгоор гишүүн өөрийн цахим хуудсаараа дамжуулан “Аргаа ч барж байна даа, Ерөнхий сайдын маань харын багийнхан. Дор дор нь үнэнээ хэлээд л явчихна, асуудалгүй. Би 2022 оноос хойш энд түрээсээр амьдарч байгаа. Ер нь хэзээнээсээ л би түрээсээр амьдарч сурсан, дуртай юм. Нэг байрлал, нэг апартментад хэдэн зуун саяыг түгжиж хуучруулж сууснаас хамгийн гоёудаас нь шилээд хэсэж явах сонирхолтой. Арай илүү амьдралтай санагддаг даа. Жаахнуудад маань яг таарсан орчинтой сайхан хотхон. Нэмээд хэлэхэд энэ хотхоны 400, 500-р байр анхнаасаа түрээсийн зориулалттай, 600, 700-р байр нь өмчлөлийнх байдаг шүү. Ер нь бол хүний гэрийн хаягийг ингэж зарлах нь хууль зөрчиж байгаа хэрэг. Гэхдээ улсын эзэн Л.Оюун-Эрдэнэд хууль ямар хамаатай биш” гэсэн.

Нэгэн цагт УИХ-ын гишүүн асан Ц.Нямдорж ХЗДХ-ийн сайд байхдаа тус хотхоны түрээсийн байранд амьдардаг, гэхдээ гэртээ зурагтгүй гэж хэлээд шуугиан тарьж байсан түүхтэй.

Монголын баячууд эсвэл гадны өндөр цалинтай ажилчид түрээсэлж амьдардаг гэгддэг “Bella Vista” хотхоны түрээсийн зориулалттай байрнууд нь 150 м/кв, сарын түрээс дунджаар 7 сая төгрөг байдаг байна. Өөрөөр хэлбэл жилд дунджаар 84 сая төгрөгийг байрныхаа түрээсэнд төлдөг гэсэн үг. Ихэнх монголчууд энэ тохиолдолд түрээсэнд төлөх мөнгөө байрны урьдчилгаанд өгч, орон сууцтай болохыг эрхэмлэнэ. Харин Ч.Лодойсамбуу гишүүний тухайд өөрийн орон сууцтай байхыг чухалчилж үздэггүй, нүүдэллэж амьдрах дуртай гэжээ.