Малчдын зээлийн хүүгийн 6%-ийн төлбөрийг малчид, үлдсэн хувийг Засгийн газар төлөх шийдвэр гарлаа

Малчдын зээлийн хүүгийн төлөлтийг хойшлуулах Засгийн газрын шийдвэр гарчээ. 

ЗГХЭГ-ын дарга Д.Амарбаясгалан хэлэхдээ "Малчдын зээлийн болон зээлийн хүүгийн эргэн төлөлтийг тус бүр нэг жилээр хойшлуулах шийдвэр гарлаа. Ингэснээр арилжааны банканд хүүгийн хуримтлал үүснэ. Иймд зээлийн хүүгийн зургаан хувийг нь малчид өөрсдөө, үлдсэн хувийг нь Засгийн газар хэрхэн шийдвэрлэх саналаа боловсруулж, тогтол гарган УИХ-аар шийдвэр гаргуулахаар шийдсэн. 

Тодруулбал улс орон даяар малчдын зээлийн нийт хэмжээ 1.3 их наяд төгрөг. Түүнд хуримтлагдах хүүгийн төлбөр нь 280 орчим тэрбум төгрөг байна. Үүнээс малчид өөрт ногдох зургаан хувийнхаа хүүг өөрсдөө төлнө. Үлдэгдэл хувь болох 220 орчим тэрбум төгрөгийн зээлийн хүүгийн төлбөрийг Засгийн газар хариуцаж төлнө" гэлээ. 

Малчдын зээлийн хүү дунджаар 20.5 хувьтай, зээлийн хэмжээ дунджаар 10 сая төгрөг байна.