ABOUT MOVIE: “Шоушанкаас оргосон нь” киноны тухай баримтууд
Холливуудын нэрт жүжигчин Тим Роббинс болон Морган Фриман нарын гол дүрд нь тоглосон "Шоушанкаас оргосон нь" киног Фрэнк Дарабонт найруулж, 1994 онд үзэгчдийн хүртээл болгосон юм. Дэлгэцэнд гарсан цагаасаа хойш үзэгчдийг зурагтын өмнө "уясаар" уй эл киноны 30 жилийн ой энэ онд тохионо.
Энэхүү киноны талаарх сонирхолтой баримтуудыг хүргэе.
-Стивен Кинг “The Shawshank redemption” зохиолоо дэлгэцийн бүтээл болгох зөвшөөрлийг 5.000 ам.доллароор зарсан ч чекээ бэлэн мөнгө болгоогүй аж. Харин зохиол нь дэлгэцийн бүтээл болсноос жилийн дараа тэрбээр чекээ жаазалж, Фрэнк Дарабонтад эргүүлэн илгээсэн бөгөөд “Чамд мөнгө хэрэг болвол хэрэглээрэй. Стив” гэсэн захидлын хамт хүргүүлжээ.
-Киноны гол дүр болох Энди Дюфрейны дүрд Том Хэнкс, Кевин Костнер, Том Круз, Николас Кейж, Жонни Депп болон Чарли Шин нар өрсөлдсөн юм. Хэнкс “Forrest Gump” (1994) кинонд тоглосноор Эндигийн дүрээс татгалзсан бол Костнерт кино маш ихээр таалагдсан ч “Waterworld” (1995) кинонд тоглохоор болсон аж.
-Редийн дүрд Клинт Иствүүд, Харрисон Форд, Пол Ньюман болон Роберт Редфорд нар тоглох боломжтой байжээ. Зохиолын дагуу бол Ред бууралтаж буй шаргал үстэй, дунд эргэм насны эр байдаг. Гэвч Фрэнк Дарабонт энэхүү дүрд өөрийн зан араншин, дуу хоолойгоороо Морган Фриманийг тохирно гэж үзсэн байна.
-Америкийн амьтан хамгааллын холбооныхон Брүүксийн тэжээдэг Жэйк хэмээх хэрээтэй хэсгийн зураг авалтыг хянаж байсан гэнэ. Шувууг хооллох зураг авалтын үеэр амьтан хамгааллын ажилчид амьд өтөөр хооллох нь бүдүүлэг гэж үзэж, байгалийн жамаар үхсэн өтөөр хооллох ёстой гэсэн шаардлага тавьсан байна.
-Кинонд Эндигийн гар томоор гарч буй хоёр хэсэг бий. Эхнийх нь буу цэнэглэж буй Эндигийн гар, нөгөөх нь шоронгийн өрөөний ханан дээр нэрээ сийлж буй Эндигийн гар. Энэ хоёр хэсэгт хоёуланд нь найруулагч Дарабонтын гарыг авчээ.
-Энди Дюфрейний чанга яригчаар тоглуулдаг дуурийн дуу нь В.А.Моцартын “The marriage of Figaro” дуурийн "Canzonetta sull’aria" ари юм.
-Киноны хамгийн анхны орлого болох 18 сая ам.доллар нь зардлыг нөхөж чадаагүй. “Оскар”-ын шагналд нэр дэвшсэний дараа тэд дахин 10 сая ам.долларын орлого олсон боловч уг кино ашиг багатай киноны жагсаалтанд багтжээ.
-Уг кино кинотеатруудад төдийлөн амжилт гаргаагүй ч, кино түрээсийн хувьд хамгийн их эрэлттэй кино болжээ. Кино театртаас олсон орлого нь хангалттай биш байсан ч "Warner brothers" компанийнхан АНУ-д 320.000 хуурцаг прокатанд зарсан байна.
-Кино алдартай болсны дараа Тед Тернер киног шууд дамжуулах эрхийг TNT сувагт нэлээд хямд зарсан учир энэхүү сувгаар тогтмол гаргах болжээ.
