Холливуудын жүжигчин Марк Уолберг өнөөдөр 53 нас хүрч байна

Марк Уолберг АНУ-ын Массачусеттс мужийн Бостонд 1971 оны энэ өдөр есөн хүүхэдтэй айлын хамгийн бага нь болон мэндэлжээ. Бид түүнийг киноны алдартай жүжигчин гэдгээр нь сайн мэдэх ч үнэндээ түүний туулж өнгөрүүлсэн амьдрал киноноос ч илүү адал явдалтай байжээ.

13 настайдаа танхай, залхуугаасаа болж сургуулиасаа хөөгдсөн Марк гудамжинд гарч, хар тамхи зардаг ажил хийж, удалгүй шоронд “шилжсэн” байна. Түүнийг хүүхдийн хорих анги руу явуулах гэхэд өөрөө зүтгэсээр байгаад насанд хүрэгчдийн жинхэнэ шоронд суусан гэдэг.

Шоронгоос суллагдсаных нь дараа түүний амьдрал өмнө нь хэзээ ч төсөөлж байгаагүйгээр нь эргэсэн юм. Тэрбээр “Marky Mark” гэх тайзны нэрээр реппер болж, бүр 1990-ээд нэлээд алдартай болсон байна. Энэ нэрээрээ тэрбээр хоёр ч цомог гаргасан. Ингэж явсаар тэрбээр дотуур хувцасны сурталчилгаанд тоглож, улмаар киноны сонгон шалгаруулалтад дуудагддаг болжээ. Жүжигчний карьераа тэрбээр 1994 онд “Renaissance man” кинонд тоглож эхлүүлсэн бөгөөд гол дүр бүтээсэн анхны кино нь 1996 онд дэлгэцнээ гарсан “Fear”. Түүнээс хойш тэрбээр 40 гаруй киноны гол дүрд тоглож, 2017 онд Холливуудын хамгийн өндөр цалинтай жүжигчдийн жагсаалтыг тэргүүлж, одоо ч эрэлттэй, бас үнэ цэнтэй жүжигчин хэвээр байсаар байна.