Сонгуульдаа улайрсан УИХ-ын гишүүд намрын чуулганаа Лхагва гарагт ХААНА

УИХ-ын намрын чуулган энэ Лхагва гараг буюу нэгдүгээр сарын 17-нд хаалтаа хийнэ. Сонгууль ойртсон сургаар чуулганд сонгуулийн тухай хэлэлцэхийн хажуугаар элдэв хуулийн төслийг тэгэс ингэсхийгээд орхих шиг болов. Нүүрсний сонсгол гэж хөөрч хуулирсаар байгаад ямар хуулийн төсөл, яаж баталсан нь тэдэнд онц биш байсан нь лавтай. Нарийн тодруулбал яг ч нүүрсний сонсголдоо бус тойргийнхоо "наймаа", усалгааг хийж явсаар гишүүд намрын чуулганаа хаагдаж байна. Одоо л харин жинхэнэ ажил нь эхэлнэ. Цагаан сарыг далимдуулан сонгууль идэвхтэй өгдөг ахмад настнуудын гар цайлгах, тойрогтоо очиж "би байгаа шүү" гэдгээ харуулж, мэр сэрхэн "пи-ар"-аа хийхээс авахуулаад ажил их бий. Зарим нь ямар тойрог нь зүгээр үү, сольчих уу гээд бантан хутгаж яваа сурагтай. Ингэхээр өчнөөн хуулийн төсөл өргөн бариад, батлах дээрээ тулж байхад гишүүдийн суудал эзгүй байх нь аргагүй биз. Өнгөрсөн жилийн намрын чуулганаар хулгай ярьсаар байгаад дуусан. Энэ удаад сонгуулиа бодоод, хууль бодох ч сөхөөгүй чуулган нь хаагдах нь.

Ирэх Лхагва гарагт чуулганы хуралдаанаар дараах асуудлуудыг хэлэлцэнэ. Үүнд:

· ““Эрдэнэс Тавантолгой” хувьцаат компанийн хувьцааны талаар авах зарим арга хэмжээний тухай” Улсын Их Хурлын тогтоолын төсөл /Засгийн газар 2023.12.20-ны өдөр өргөн мэдүүлсэн, эцсийн хэлэлцүүлэг/

·Мэргэжлийн нэгдсэн холбооны эрх зүйн байдлын тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Н.Учрал 2019.02.20-ны өдөр өргөн мэдүүлсэн, эцсийн хэлэлцүүлэг/

· /Засгийн газар 2024.01.11-ний өдөр өргөн мэдүүлсэн, эцсийн хэлэлцүүлэг/

·Өрийн удирдлагын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2024.01.11-ний өдөр өргөн мэдүүлсэн, эцсийн хэлэлцүүлэг/

·Төрийн хэмнэлтийн тухай хуульд нэмэлт, өөрчлөлт оруулах тухай хуулийн төсөл /Засгийн газар 2024.01.11-ний өдөр өргөн мэдүүлсэн, эцсийн хэлэлцүүлэг/

·“Төрийн байгууллагуудыг бүсчлэн байршуулах тухай” Улсын Их Хурлын тогтоолын төсөл /Засгийн газар 2024.01.05-ны өдөр өргөн мэдүүлсэн, эцсийн хэлэлцүүлэг/

· “Хянан шалгах түр хороо байгуулах тухай” Улсын Их Хурлын тогтоолын төсөл

·Олон нийтийн радио, телевизийн Үндэсний зөвлөлийн гишүүнийг томилох, чөлөөлөх тухай асуудал

·Төрийн албаны зөвлөлийн гишүүнийг томилох, чөлөөлөх тухай асуудал

·“Монгол Улсын Их Хурлын 2024 оны хаврын ээлжит чуулганаар хэлэлцэх асуудлын тухай” Улсын Их Хурлын тогтоолын төсөл

·Хууль, тогтоолын төсөл эцэслэн батлах

·Монгол Улсын Их Хурлын 2023 намрын ээлжит чуулганы хаалт