Давс мэт шорвог шийдвэртэй нийслэлийн "далдага" дарга нар

УИХ-ын гишүүнээс хотын даргад томилогдсон Х.Нямбаатар Сумкагаас илүү хотын дарга байх гэж хэрэндээ л хичээж, давс мэт шорвог шийдвэр гаргахаар үйлээ үзэж байх шиг. Хотыг бүсчилсэн хэсэг болгож, татвар, торгуулиа төлөөгүй иргэдийг хотын төв рүү оруулахгүй, иргэдийн зорчих эрхийг хязгаарлаж, автомашиныг тэгш, сондгойгоор сар гаран туучуулав. Дээрээс нь хоёрхон хоногийн өмнө гаргасан нийтийн тээврийн чиглэл өөрчилсөн явдал.

Дун өвлийн хүйтэнд ямар ч мэдээлэлгүйгээр маргааш автобус ингэж явна, заавал ингэж яв гэж тушаав. Гэвч үүнээс өмнө автобусны чиглэл, хоорондын зай, богино эргэлт, хүлээлт, хүрэлцээ зэргийг бодитоор хэмжиж үзээгүй бололтой. Угтаа бол нийслэлийн хурган албаны дарга нар хэдэн сарын турш туршилт хийгээд, мэдээллээ цаг тухай бүрт нь олон нийтэд хүргэх ёстой байв. Гэвч зарим нь автобусаар зорчих минутыг багасгахаар тооцсон, иргэд өөрсдөө буруутай, бид сарын өмнө мэдээлсэн гэж тун захирангуй, зандрангуй тайлбар өгч байлаа. 

Х.Нямбаатарыг ХЗДХ-ийн сайд байхад дэд сайдаар ажиллаж байгаад хотын дарга болоход бөөрөнд нь наалдаж ирсэн Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг хэлэхдээ нийтийн тээврийн шинэ маршрутыг сарын өмнө мэдээлсэн гэж ундууцав. 

Хот хариуцдаг, дэд бүтэц, утаа, түгжрэл, нийтийн тээврийн асуудал хариуцдаг нийслэлийн хурган дарга нар өөрсдөө түгжрэхгүй, нийтийн тээврээр зорчдоггүй хүмүүс. Иргэдийн нүдийг бүлтийлгэсэн шийдвэр гаргасан тэд угтаа хотын даргаа дагаж ирсэн "далдага"-ууд. Асуудлаа мэдэхгүй, ажлаа мэдэхгүй, бодит орчноо мэдрэхгүй байж ажил хийсэн нэртэй болж харагдах гэж хэдэн сар чадахаараа гүрийсэн нь ямар үр дүнтэй байгааг ганцхан шийдвэрээс нь харж болно.