36 лиценз эзэмшдэг уул уурхайн магнат Ногоон намыг авч болох уу

Онолдож дүрэмдээд яахав. Товчхондоо, Ногоон намын үзэл баримтлал бол байгаль орчныг хамгаалах, экологийн тэнцвэртэй байдлыг хадгалахын төлөө бүхий л үйл ажиллагаагаа зориулахад оршино. Гэтэл Монгол Улсын уул уурхайн магнат Б.Нямтайширын хүү, “МАК”-ийн өв залгамжлагч Н.Номтойбаяр Ногоон намыг худалдаж авчихаад улс төр хийж эхэлсэн.

Олон улсын хэмжээнд ногоон үзэл баримтлалтай олон нам бий. Тэдгээр нь төрийн эрхийн төлөө улайран тэмцдэггүй. Гагцхүү үзэл баримтлалын дагуу хөтөлбөрөө боловсруулж, үйл ажиллагаа явуулдаг байна. Төрөөс тус намын үзэл баримтлал дор боловсруулсан ногоон хөтөлбөрийн дагуу дэмжлэг үзүүлдэг ийм л жишиг байдаг аж. Энэ нь тогтсон жишиг.  

Харин манайд уул уурхайн эзэд ногоон үзэл баримтлалтай нам худалдаж авч байгааг юу гэж ойлгох вэ. Н.Номтойбаярын хувьд уул уурхайн 36 лиценз эзэмшиж байна. Бүр томоохон хэмжээний шүү. Үүнээс харахад Монгол Улсын газар нутгийн хамгийн үнэ цэнтэй, хамрах хүрээ том газар нутгийг ухаж буй, заримыг нь ухахаар зэхэж буй эзэн нь ногоон үзэл бүхий намыг худалдан авч байгаа нь манай улсад ямар ч бодлого алга. Улс төрийн намуудад нь үзэл баримтлал, итгэл үнэмшил гэж байхгүйг харуулж байна.

Өдгөөгийн Ерөнхийлөгч У.Хүрэлсүх Ерөнхий сайд байхдаа нэгэнтээ “Монголын 3.2 сая хүн идэх ёстой баялгийг тавхан ам бүлтэй айл авчихаад байгаа. Тавхан ам бүлтэй нэг айл  36 лиценз эзэмшиж байгаа. МАК гэж компани. Нямтайширын хүү Номтойбаяр гэж нөхөр УИХ-д сууж байна. Төрийн эрх мэдлийг эзэмшиж байгаа. Тэгэхэд цаана нь гурван сая хүн ядуу амьдарч байна. Цагаан Суварга гэхэд 15 тэрбум ам.долларын өртөгтэй орд” хэмээн чуулганы хуралдаан дээр цоллож байв.

Уул уурхайн магнат Монгол Улсад байгаа ганцхан ногоон үзэл баримтлал бүхий улс төрийн нам худалдан авч байна гэдэг энэ улсын газар нутгийг нэг мөр эзэмших гэсэн хэтийн санаархал байхаас зайлахгүй.

С.ДАНЗАН