Авлига, албан тушаалын хэрэгт яллагдагчаар татагдсан гишүүд мандат авахгүй!

Сонгуульд нэр дэвшигчид сарын дараа мандатаа авах ёстой. Гэвч энэ сонгуулиар эрх баригч намын хэд, хэдэн гишүүд хоосон хоцрох нь. Учир нь авлига, албан тушаалтай холбоотой гэмт хэрэгт нэр холбогдсон л бол мандат олгохгүй гэж МАН-ын зүгээс хэлсэн. Сонгуулиас өмнө ногоон автобус, Хөгжлийн банк, нүүрсний хулгай гээд олон ч хэрэгт улстөрчид хуйгаараа нэр холбогдсон. Нүүрсний хэрэгт 124 хүн яллагдагчаар татагдаж үүнээс нэг гишүүнд ял оноосон нь Т.Аюурсайхан. Нэмээд З.Энхболд, Б.Энх-Амгалан нар мөнгөн торгуулаар шийтгүүлсэн. Дээр нь ордны найрагч Ж.Мөнхбат шалгуулсаар л байгаа. Шумаар бол өөр нам, эвсэлтэй нэгдэж байгаа гэх яриа ч гарсан. Бас болоогүй Н.Наранбаатар гишүүний хувь заяа шүүхийн хаалган дээр дэнжигнэж байгаа. Ямар хариу гарахаас хамаараад нэр дэвшихээ шийднэ гээд тонтогнож сууна.

Нийтийн тээврийн парк шинэчлэлийн хүрээнд оруулж ирсэн 100 ширхэг ногоон автобус чанарын болоод худалдан авах ажиллагааны хувьд асуудал дагуулсан. Үүнтэй холбогдуулан Ж.Сүхбаатарыг яллагдагчаар татсан. Түүнийг “Тэнүүн-Огоо” ХХК-ийг хууль бусаар шалгаруулсан нь хөдөлшгүй баримтаар тогтоогдсон гэх мэдээлэл бий.

Зарчмаараа эл хэргүүдэд нэр холбогдоод, яллагдагчаар татагдсан л бол нэр дэвшүүлэхгүй гэж бүлгийн дарга нь хүртэл ам гарсан. Гэвч цаг нь тулахаар мөнгөний төлөө нүдээ ухахаас буцахгүй улстөрчид дээрх хүмүүсээ торойтол гаргаад ирэх вий. Бас болоогүй Хөгжлийн банкны хэргийн шийдвэр улстөрчдөд, өндөр албан тушаалтнуудад хууль хэрхэн үйлчилдгийг харуулчихсан. Тэгэхээр тэдэнд хулгай хийгээд баригдсан ч хоёр дахь боломж гэж үргэлж бий. Тэр хоёр дахь боломжийг олгох, үгүй нь иргэдийн гарт бий. Даанчиг даварсан хулгайчууд шүүх, хууль нэрийн дор тактикаа боловсруулаад гэнэт л сайн хүний дүрээр олноо дахин мэндэлдэг нь жам болоод удаж байна.