М банкны гүйцэтгэх захирал Л.Соронзонболд MCS-ийг төлөөлөн зүүн бүсэд өрсөлдөнө

Энэ удаагийн сонгуульд МАН-ын зүгээс маш олон битүү морь, олонд танигдаагүй хүмүүсийг нэр дэвшүүлсэний нэг нь М банкны гүйцэтгэх захирал Л.Соронзонболд. Тэрээр Дорнод, Хэнтий, Сүхбаатар буюу 6-р тойрог, зүүн бүсэд Ерөнхий сайд Л.Оюун-Эрдэнэ, У.Хүрсэлсүх ерөнхийлөгчийн дүү У.Отгонбаяр, П.Анужин, ХХААХҮ-ийн дэд сайд М.Ганхөлөг тэргүүтэй ахан дүүсийн фракцитай нэг баг болж хүч үзнэ.

М банк нь MCS-ийн охин компани. Тодруулбал, Ж.Оджаргал ноёнтны төрсөн эгчийн хүү Б.Тэмүүлэнгийн үүсгэн байгуулсан банк. Өөрөөр хэлбэл Л.Соронзонболд MCS-ийн төлөөний хүн гэсэн үг. Тус групп нь Монголын улс төрд үеийн үед гар, хөлөө шургуулж ирсэн тогтсон уламжлалтай. БШУ-ны сайд Л.Энх-Амгалангаас авахуулаад сүүлийн хэдэн сонгууль дараалан нэр дэвшээд өвдөг шороодсон Л.Элдэв-Очир тэргүүтэн. Цаашилбал, Сангийн сайд асан С.Баярцогт, ХЗДХ-ийн сайд асан Ц.Мөнх-Оргил, ГХ-ийн сайд асан Д.Цогтбаатар, ЭБЭЧ-ний сайд асан Д.Зоригт, БСШУ-ны сайд асан Ё.Отгонбаяр тэргүүтэй MCS-ийн угшил, дэмжлэгтэй улс төрчдийн нэрс хөвөрнө. Энэ удаад тойрогт Л.Соронзонболд, “Жет скүүтер”-ийн Г.Дашням, жагсаалтад МҮХАҮТ-ийн дарга Д.Энхтүвшин нарын шинэ төлөөллүүдээ улс төрд илгээж байна.

Л.Соронзонболдод бас нэг сонирхолтой өнцөг бий. Тэрээр дуулиант нүүрсний хулгайн хэрэгт нэр холбогдож анх олонд танигдсан. МАН-ын Шинэчлэлийн хорооны гишүүн тэрээр өдгөө нүүрсний хэргээр ял эдэлж буй экс гишүүн Т.Аюурсайханд багагүй хэмжээний мөнгө өгсөнтэй холбоотой гэрчээр дуудагдаж байв.