Сонгууль-2024: Төвийн бүс буюу 5-р тойргийн бантан

Сонгуулийн 13 тойргоос хамгийн олон мандаттай нь төвийн бүс буюу Дархан, Сэлэнгэ, Төв аймаг. Нийт 10 мандаттай байхаар заасан тус тойрогт 2020 оны сонгуулиар ах нам үнэмлэхүй ялалт байгуулжээ. Төв аймгийн хувьд хэзээний улаан байж ирсэн. Тиймдээ ч тус аймгийн Засаг дарга Ж.Батжаргал нэр дэвшин, гишүүн болж чадсан. Энэ жил ч мөн даагаа нэхэж буй. Түүнтэй хамт Ерөнхийлөгчийн ахлах зөвлөх С.Лүндэг дэвшжээ. Тэгвэл сөрөг хүчин АН-д зангарагтай дарга Ц.Туваан, С.Эрдэнэболд, Д.Эрдэнэсувд, Д.Доржпүрэв нар Төв аймагт горилсон.

Харин улсынхаа хоёр дахь том хот гэгддэг Дархан-Уул аймагт Сангийн сайд Б.Жавхлан, дарханы замаар нүүрээ тахалж заншсан УИХ-ын гишүүн Г.Дамдинням, Боомтын сайд Б.Тулга, гурван ч удаа ИХ-д гишүүн суусан Ж.Энхбаяр дэвшиж буй. Харин тэдэнтэй хамт АН-аас хөгширдөггүй С.Баярцогт ханцуй шамлан орсон. АН энэ тойрогт ихээхэн ач холбогдол өгч буй. Тухайлбал намынхаа арай дээгүүр жагссан С.Баярцогт, Д.Эрдэнэбат, Ц.Туваан нарыг залуу үеийн төлөөлөл С.Эрдэнэболдой явуулснаас ажиглагдана. С.Баярцогт, Д.Эрдэнэбат нарын хувьд өмнө нь парламентын гишүүн, мөн Засгийн газрын гишүүн, сайдаар ажиллаж байсан удаатай. Хоёр намын эмэгтэй квот харин сул харагдана. Сэлэнгийн хаяагаа хадардаг Д.Өнөрболор, Ч.Ундрам нар нутагтаа дахин зүтгэсэн. Олиггүй пиар хийж, 4 жилийн хугацаанд дүлий суусаар таарсан хоёрын хажуугаар АН-ын хажууд парламентад суугаагүй ч, намдаа үнэнч зүтгэсэн Д.Үүрийнтуяа, Д.Эрдэнэсувд нар горилсон. Эндээс харвал хэнийг нь ч хэнтэй нь харьцууламгүй сул улстөрчид. Чухамдаа төвийн бүсийн өрсөлдөөн эрчүүдийн дунд өрнөх нь тодорхой байна.