Сонгууль-2024: Хөрөнгөлөг говийнхны хөлжүүрхэх тойрог

Монголын хамаг л хөрөнгө бэлтэй, бийлэгжүү улстөрчид энэ тойргоос тодордог. Тухайлбал оффшор Сү.Батболд говийн бүсдээ илт давуу ялалт байгуулсаар улс төрийн том ах болтлоо томорсон байдаг. Тэгвэл энэ удаад говийн бор Б.Дэлгэрсайхан, Г.Батсуурь, Т.Энхтүвшин, Б.Саранчимэг тэргүүтэй парламентын хууччуул МАН-аас дахин нэр дэвшихээр болсон. Үүн дээр нэмэгдээд Ерөнхийлөгчийн хэвлэлийн төлөөлөгч Ө.Золбаяр горилж буй. Түүний хувьд МАН-аас говийн тойрогт тодорч байгаа ганц содон, гоц дүр нь гэхэд буруудахгүй. Нас залуу, улс төрийн туршлага мэдлэгийн хувьд ч муухан улстөрчөөс дээр болсон түүнийг ах нарыгаа өнгөлөхөөр илгээсэн мэт. Н.Наранбаатарын тухайд 2020 оны сонгуульд Өмнөговь аймгаас гишүүн болсон.

Тэгэхдээ нүүрсний хулгайн хэрэгт холбогдоод, яллагдагчаар татагдсан байдаг. Эрх баригч нам ял авсан, хэрэгт холбогдсон хүмүүсийг нэр дэвшүүлэхгүй гэсэн ч түүнд эр олгожээ. Б.Саранчимэгийн тухайд Баянзүрх дүүргээ хаяад энэ тойргийг зорьж яваа. Харин АН-аас говьдоо мөн л илүүрхдэг “Ажнай” Б.Бат-Эрдэнэгүй өрсөлдөнө. Тухайлбал нүүрсний хэрэгт холбогдон, яллагдагчаар татагдсан Өмнөговь аймгийн Засаг дарга Р.Сэддорж улс төрийн том тохироо хийж гарч ирж чаджээ. Аймагтаа ашигт малтмалын лицензийг арав, арваар нь олгосон түүнд оноогдох хэргүүд өдрөөс өдөрт арвижсаар буй. Харин Дорноговь аймгийг төлөөлж аймгийн ИТХ-ын даргаар ажиллаж байсан Г.Ганбаатар горилж байна. Үүнээс өөр сэтэргүй түүнийг говийн бүсийнхэн итгэл хүлээлгэх нь юу л бол. Мөн Говьсүмбэр аймгийн Засаг даргаар ажиллаж байсан Л.Одсэр нэр дэвшжээ. Тэрбээр Засаг даргаар ажиллаж байхдаа эрх мэдэл албан тушаалын байдлаа урвуулан ашигласан хэрэгт холбогдон АТГ-аар шалгуулж байжээ. Эмэгтэй квотод Ерөнхийлөгч асан Х.Баттулгын ачаар сэтгүүлч Т.Мөнхбаясгалан горилсон. Т.Мөнхбаясгалангийн хувьд МАН-ын хоёр бүсгүйг дарах жинтэй нэр нөлөөтэй хэмээн ярьж буй. Чухам говийн бийлэгжүү хүмүүсийн дунд өрнөх улс төрчдийн хэн нь тодорч, хэн нь унахыг тэдний хөрөнгө мөнгөний хэмжээ мэдэх биз ээ.