АНУ-ын Конгрессын завсрын сонгуулийн төлөөх өрсөлдөөн туйлын ширүүсэв

АНУ даяар Конгрессын завсрын сонгуулийн үндсэн санал хураалт явагдаж байна. Флоридагийн их сургуулийн судалгааны төвөөс мэдээлснээр 52 сая гаруй иргэн санал хураах өдрөөс өмнө урьдчилан саналаа өгчээ. Энэ удаагийн сонгуулиар Төлөөлөгчдийн танхимын бүх 435 суудал болон Сенатын 35 суудлын төлөө Бүгд найрамдах нам, Ардчилсан намын нэр дэвшигчид өрсөлдөж байна. Цагаан ордон болон хууль тогтоох байгууллагын хоёр танхимд хоёуланд нь олонх болоод байсан Бүгд найрамдах намын хувьд энэ сонгууль эрх мэдлээ хадгалж үлдэх томоохон сорилт болж байна.

Санал асуулгын дүнгээр Ардчилсан нам Төлөөлөгчдийн танхимд олонх болох төлөвтэй байгааг "CBS News" тэргүүтэй хэвлэлүүд онцоллоо. Амьжиргааны өртөг нэмэгдсэнд иргэд бухимдаж, засаг захиргааны бодлогод сэтгэл дундуур байдал давамгайлж байгаа нь сөрөг хүчинд давуу тал олгож байна. Иймд Ардчилсан намынхан сурталчилгааныхаа төгсгөлийн шатанд амьжиргааны зардал болон авлигын сэдвийг голчлон хөндөж, сонгуулийг Ерөнхийлөгч Дональд Трампын бодлогод дүн тавих санал асуулга хэмээн тодорхойлж буй юм. Тухайлбал, Виржиниа мужийн хоёрдугаар тойрогт Ардчилсан намаас нэр дэвшигч Элейн Луриа өрсөлдөгч Жен Киггансыг Ерөнхийлөгчийн бодлоготой шууд холбон шүүмжлэх тактик баримталж байна.

Харин Сенатын танхимд хяналтаа тогтоох өрсөлдөөн тун ширүүн өрнөж байгаа бөгөөд Ардчилсан намынхан эрх мэдлийг гартаа авахын тулд хамгийн багадаа дөрвөн суудал нэмж авах шаардлагатай тулгарчээ. "Cook Political Report"-ын үнэлснээр Аляска, Айова, Канзас, Мэн, Мичиган, Охайо болон Техас зэрэг долоон муж сонгуулийн эцсийн дүнд шийдвэрлэх нөлөө үзүүлэхээр байна. Эдгээр мужийн зургаад нь Бүгд найрамдах нам өмнө нь суудалтай байсан бол нэгд нь Ардчилсан нам суудал хадгалж байв. Нөгөө талд Бүгд найрамдах намынхан санхүүгийн боломждоо түшиглэн хилийн аюулгүй байдал, соёлын үнэт зүйлс болон нийгмийн халамжийн бодлогын эрсдэлийг хөндөж, Айова, Канзас мужуудад олон нийтийг хамарсан өргөн хэмжээний цуглаануудыг зохион байгууллаа.

Мужуудын түвшинд нэр дэвшигчдийн өрсөлдөөн улам ширүүсэж байна. Кентакки мужид 84 настай сенатор Митч Макконнелл улс төрийн тавцанг орхиж буйтай холбогдуулан Ардчилсан намын Чарльз Бүүкер, Бүгд найрамдах намын Энди Барр нар өрсөлдөж байгаа бөгөөд Ерөнхийлөгч асан Барак Обама Чарльз Бүүкерийг дэмжиж буйгаа илэрхийлжээ. Мөн Охайо мужид эдийн засаг, эрүүл мэндийн зардлын өсөлт болон төрийн албан хаагчдын олон сарын ажил хаялтын асуудал хурцадсан энэ үед Ардчилсан намын Шеррод Браун санал асуулгад өрсөлдөгчөөсөө ялимгүй илүүрхэж байна. Түүнчлэн Мичиган мужид Ардчилсан намаас нэр дэвшигч Абдул Эл-Сайед намын дотоод уур амьсгалыг бэхжүүлэх зорилгоор Детройт хотод эв нэгдлийн уулзалт хийв.

Энэхүү завсрын сонгуулийн үр дүн нь АНУ-ын ойрын жилүүдийн хууль тогтоох бодлого, төсвийн хуваарилалт хийгээд засаглалын тэнцвэрт байдалд шууд нөлөөлөх ач холбогдолтой юм. Ардчилсан нам Төлөөлөгчдийн танхимд олонх болбол гүйцэтгэх засаглалд тавих хяналт чангарна. Харин Бүгд найрамдах нам эрх мэдлээ хадгалж үлдвэл одоогийн бодлогоо үргэлжлүүлэн хэрэгжүүлэх боломжтой болох тул санал хураалтын эцсийн дүн дэлхий нийтийн анхаарлын төвд байна.