“Попын Дарь эх” Шер өнөөдөр 78 нас хүрч байна

Алдарт дуучин, жүжигчин Шер (Cher) буюу Шерилин Саркисян 1946 оны 5-р сарын 20-нд АНУ-ын Калифорниа мужид төржээ.

Тэрбээр 16 настайгаасаа Фил Спекторийн арын дуучин болж, энэ үедээ дуучин Сонни Бонотой танилцан, удалгүй гэрлэснээр тэр хоёр хамтран “Цезар, Клео хоёр”, “Сонни, Шер хоёр” гэсэн гоё нэртэй хоёр ч сингл хийсэн нь олон улсын хөгжмийн тавцан дахь тэдний нэрийн хуудас болсон юм. Сонни Боногоос салсанаас хойш Грегг Оллмен /”The Allman Brothers”/, Жин Симмонс /”Kiss”/ болон Лес Дьюдек нарын олон эрчүүдтэй хайр сэтгэлийн холбоотой байснаар хэвлэлийнхнээс “сохор дурлалтан” гэдэг хоч авчээ.

Шер дуучин байхын зэрэгцээ кино жүжигчин болох мөрөөдлөө биелүүлж, “Good times”, “Chastity” зэрэг кинонд дараалан тоглосон.  Уг кинонууд амжилттай болсоны дараа 1971 онд тэрбээр Америкийн хит-чартыг тэргүүлсэн “Gypsies”, “Tramps the thieves” болон “Half breed”, “Black lady” зэрэг синглиэ бүтээв. Удалгүй 1975 онд Шер алдарт “Warner brothers” фирмтэй гэрээ байгуулж, продюсер Жимми Уэббийн туслалцаатай “Stars” цомгоо бүтээсэн байна.

1981 онд “Dead ringer for love” цомгоо хийж дууссаны дараа түүний кинонд тоглох ажил үргэлжилж “Silkwood” киноны гол дүрийг бүтээгээд зогсохгүй, энэ дүрээрээ “Оскар”-ын шагналд нэр дэвшиж байв. Улмаар “Mask”, “The witches of eastwick”, “Suspect” зэрэг кинонд тоглосон бөгөөд 1987 онд Шер “Оскар”-ыг “Moonstruck” киногоор хүртсэн юм.

Өнөөг хүртэл хөгжмийн ертөнцийн оргилд байсаар буй эл уран бүтээлч карьерийнхээ туршид 100 гаруй сая хувь пянз борлуулсан бүх цаг үеийн хамгийн шилдэг уран бүтээлчдийн нэг юм. Тэрбээр 1963 оноос уран бүтээлээ туурвиж эхэлсэн ба өнгөрсөн хугацаанд “Гремми”, “Эмми”, “Алтан бөмбөрцөг” тэр ч бүү хэл Каннын кино наадмаас ч шагнал хүртэж байжээ.