Жүжигчин М.Саранцэцэгийн төрсөн өдөр өнөөдөр тохиож байна

МҮОНТ-ийн “Хэцүү анги” олон ангит киноны Сүнжид багшийн дүрийг чадварлаг бүтээж, эл дүрээрээ залуу үеийнхэнд дуудуулах болсон жүжигчин М.Саранцэцэг энэ өдөр мэндэлжээ. Тэрбээр 1985 онд Улсын багшийн дээд сургуулийн Кино, драмын ангийг төгссөн. Гавьяат жүжигчин Ш.Алтанцэцэг, С.Лхагвасүрэн, УДЭТ-ын захирал Д.Цэрэнсамбуу нарын уран бүтээлчидтэй нэг анги. Жүжигчин Ш.Алтанцэцэг тэр хоёрын хувьд дунд сургуулийн 10-р ангиасаа найзалсан, одоо ч сайхан найзууд хэвээрээ.

Тэрбээр уран бүтээлийн гараагаа 1987 онд дэлгэцнээ гарсан Х.Дамдин найруулагчийн “Мандах нарны туяа” киноны Гүсэлмаагийн дүрээр эхэлжээ. Энэ талаараа тэрбээр “Манай ангид арван хэдэн охин байснаас Х.Дамдин найруулагч энэ дүрийг надад өгсөн. Яагаад намайг сонгосныг нь мэдэхгүй. Тэр кинонд тоглосноос хойш миний дараа дараагийн кинонд тоглох урсгал нээгдсэн. Тэр үед анх кинонд тоглож байсан болохоор хөөрхөн л гарч байвал гэж бодохоос яавал сайн жүжиглэх вэ гэдгээ ч мэдэхгүй байлаа” хэмээсэн. Улмаар 1992 онд “Булингар” кинонд тогложээ. Энэ дүрд түүнийг Ардын жүжигчин П.Цэвэлсүрэнтэй адилхан монгол төрхтэй болохоор нь сонгсон гэдэг. Түүнээс хойш дэлгэцийн 10-аад бүтээлд тоглосон нь архивлагдаад үлджээ. Өдгөө тэрбээр дэлгэцийн уран бүтээлүүдэд тоглохын зэрэгцээ зургийн даргын албыг ч давхар гүйцэтгэдэг.