WHO is WHO: Артист Davaidasha гэж хэн бэ
Залуу артист Davaidasha ирэх долоо хоногийн баасан гарагт буюу тавдугаар сарын 31-нд Төв цэнгэлдэх хүрээлэнд “Зуны зугаа – Davaidasha” бүрэн хэмжээний бие даасан тоглолтоо хийнэ.
Түүний тухай сонирхолтой баримтуудыг хүргэе.
- Түүнийг төрөхөд Даваадаш гэж хайрласан ч нэр нь хүндэдсэн учраас Г.Ариунболд болгож сольжээ. Харин тайзны нэрийн хувьд Даваадаш гэдгээсээ санаа аван, бага зэрэг хувиргаад л өгч байж.
- Тэрбээр Эрдэнэт хотод эмээ дээрээ өссөн. Эмээ нь түүнийг дуулах, уран бүтээл хийхэд хэзээ ч дургүйцэж байгаагүй. Тэр ч бүү хэл анхны спикерийг нь хүртэл авч өгч байжээ.
- Davaiidasha хятад хэлний Цай Хун дунд сургуулийг дүүргэсэн.
- Тэрбээр дуулахаас гадна сагсан бөмбөг, хоккей тоглодог, мөн электро болон хип хоп бүжгийн хоббитой.
- 2017 онд анхны дуугаа бичүүлж байжээ. Тухайн үед найзтайгаа хамт мөнгөө цуглуулж байгаад Эрдэнэт хотод байдаг ганц студид хоолойгоо бичүүлсэн гэнэ.
- 2019 он гэхэд тэрбээр “Soundcloud” дээр өдөрт 2-3 дуу оруулдаг байв.
- Davaidasha гэх нэрээр анх “Хүүхдийн тоглоом” дуугаа цацаж байжээ.
- “Чи чинь нээрээ” гэдэг дуугаа цацсаны дараа өөрийгөө олны анхааралд өртөж байгааг анх мэдэрсэн гэдэг. Мөн артист 290, Noubold-той хамтарсан “Удаа дараа” гэдэг уран бүтээл нь гурван долоо хоногт нэг сая үзэлт хүрсэн нь түүний эвдэхийг хүсдэг тоо аж.
- Дуунуудаас нь өөрийг нь хамгийн сайн тодорхойлох нь “Аладдин”. Энэ нь өөрийнхөө талаар дуулсан дуу гэнэ.
- Тэрбээр эргэн тойрондоо байгаа бүх хүнээс урам зориг авдаг гэнэ. Бас амьд тоглолт, фестивалиуд үзэж өөрийгөө цэнэглэх дуртай ажээ.
- Дуучин BX-тэй хамтран уран бүтээл хийхийг хүсдэг аж. Түүнийг монголд R&B жанр танигдаагүй байхад энэ төрлөөр дуу хийж бидэнд сонсгосон хүн хэмээн хүндэлдэг гэнэ.
