Сагсан бөмбөгчин Кармело Энтони 40 нас хүрч байна.

Нэрт сагсан бөмбөгчин Кармело Энтони 1984 оны энэ өдөр АНУ-ын Нью-Йоркийн Брүүклинд төржээ. Түүний эцэг Пуэрто-Рико гаралтай хүн байсан бөгөөд Кармелог хоёр настай байхад өөд болж, найман настайд нь түүний гэр бүл Балтимор хот руу нүүснээр тэнд түүний ирээдүйн шилдэг тамирчин болох суурь нь тавигдсан юм.

Мело хэмээх хочтой тэрбээр Таунсон католик ахлах сургууль болон Окхилл академийг амжилттай дүүргэжээ. Үүний дараа Сиракусын их их сургуульд элсэн орж, 2003 онд эл сургуульдаа анхны NCAA (National Collegiate Athletic Association)-ийн аварга цолыг авчирсан төдийгүй өөрөө тэр улирлын шилдэг тоглогч болсон юм. Улмаар тэрбээр их сургуулиа орхиж, 2003 оны NBA-ийн драфт буюу шинэ тоглогчдын сонгон шалгаруулалтад орж гурав дахь сонголтоор Денвер багт сонгогдож байжээ.

Тэрбээр “Денвер Наггетс” багт олон жил хүчин зүтгэсний дараа 2011 оны солилцооны цонхоор “Нью-Йорк Никс” багт очсон байна. NBA-д элссэн цагаасаа хойш тэрбээр лигийн шилдэг тоглогчдын нэг байсаар ирсэн бөгөөд 2004-2010 оны хооронд “Денвер Наггетс” багийг тогтмол плей-оффт шалгарахад голлох үүргийг гүйцэтгэж, 2009 онд багийн хамтаар бүсийнхээ шигшээ тоглолтод шалгаран үлдэж байв. Мөн тэрбээр “Оклахома Сити Тандер”, “Хюстон Рокетс”, “Портланд Трэйл Блэйзерс”, “Лос Анжелес Лэйкерс” багуудад мөн тоглож байв.

Кармело Энтони Америкийн сагсан бөмбөгийн шигшээ багийн хамтаар 2004, 2008, 2012 оны олимпийн наадам, 2006 оны сагсан бөмбөгийн дэлхийн аварга шалгаруулах тэмцээнүүдэд оролцож 2008 оны Бээжингийн олимп, 2012 оны Лондонгийн олимп, 2016 оны Рио де Жанейрогийн наадмуудад аваргалж, 2006 оны дэлхийн аваргаас хүрэл медаль хүртэж байжээ.