Алдарт жүжигчин Морган Фриман энэ өдөр мэндэлжээ

Морган Фриман 1937 оны зургадугаар сарын 1-нд Тенниси мужийн Мэмфис хотод Морган Порерфильд Фриман хэмээх үсчний гэр бүлд төржээ. Морган 6-хан настайгаасаа л эхлэн тайзан дээр анхныхаа дүрүүдэд тоглож эхэлсэн гэдэг. Гэхдээ түүний идэр залуу насны амьдралд бусдаас онцгойрохоор зүйл огт үгүй. Дунд сургууль, сайн дурын жүжигчдийн дугуйлан, цэргийн алба гээд байдаг л жирийн намтар. Нэр алдарт хүртлээ тэр цэрэгт механикч, Лос-Анжелес хотын коллежид бичээч, “Opera ring music group”-т бүжигчин, телевизийн хөтлөгч зэрэг маш олон ажил хийж үзэж байв.

1971 онд тэрбээр анхныхаа кинонд тоглож урлагийн тогооноос халбагадчихаад л есөн жил мартагдсан. 1980 онд “Brubaker”  кинонд тоглоод дахиад л мартагдлаа. Энэ уналтын дараа 1987 онд дэлгэцнээ “Street smart” хэмээх кино гарч Фаст Блэк гэдэг эрийн дүрийг бүтээсэн Морган “Оскар”-т нэр дэвшив. 50 насныхаа босгон дээр, урлагт “чанагдаад” гуч орчим жил өнгөрсний дараа. Тийм ч учраас тэрбээр “Шөнө мандсан нар” хэмээх хоч авсан байх.  Түүнээс хойш Морган Фриман хэзээ ч муу кинонд тоглоогүй. Тэгэх бүртээ үзэгчдийн сэтгэлд хоногшсон дүр бүтээж тухайн жилийнхээ нэр алдартай хамаг л кино наадмуудын шагналыг тогтмол хамдаг байлаа. Тэрбээр өнөөдрийг хүртэл 148 уран сайхны киноны гол болон туслах дүрд тоглож, дөрвөн удаа “Оскар”-т нэр дэвшиж, нэг удаа хүртсэн. Мөн “Алтан бөмбөрцөг”-ийн эзэн. Харин тэрбээр анхны бөгөөд найруулагчаар нь ажилласан цорын ганц  “Bopha” драмын төрлийн киногоо 1993 онд бүтээсэн байна. 

Морган Фриман дөрвөн удаа гэрлэж хоёр хүү, хоёр охины эцэг болсон. Өдгөө 90 шүргэж байгаа тэрбээр багахан эдлэн газартай, тэндээ цөөрөм байгуулж загас үржүүлдэг, бас зөгийн аж ахуй эрхэлдэг байна.