ШХАБ-ын хуралдааныг багцалъя: НҮБ болон төрийн тэргүүнүүд ЮУ ХЭЛЭВ

  Бүгд Найрамдах Киргиз Улсын нийслэл Бишкек хотноо Шанхайн хамтын ажиллагааны байгууллагын (ШХАБ) Төрийн тэргүүнүүдийн зөвлөлийн 26 дугаар хуралдаан амжилттай зохион байгуулагдлаа. Тус байгууллагын 25 жилийн ойтой давхцсан энэхүү түүхэн дээд хэмжээний уулзалтыг Киргизийн Ерөнхийлөгч Садыр Жапаров даргалж, гишүүн 10 орны удирдагчид болон НҮБ-ын Ерөнхий нарийн бичгийн дарга Антонио Гутерриш нар оролцлоо.

Уулзалтын үеэр дэлхийн засаглалын шинэчлэл, уур амьсгалын шударга ёс болон хиймэл оюун ухааны аюулгүй байдлын талаар чухал сэдвүүдийг хөндөн хэлэлцлээ.

Энэхүү дээд хэмжээний уулзалтын хүрээнд БНХАУ-ын Дарга Ши Жиньпин Киргиз Улсад төрийн айлчлал хийсэн нь хоёр талын харилцаанд шинэ хуудас нээсэн үйл явдал болов. Наймдугаар сарын 30-наас есдүгээр сарын 2-ны хооронд үргэлжилсэн уг айлчлалын үеэр БНХАУ-ын Дарга Ши Жиньпин болон Киргизийн Ерөнхийлөгч Садыр Жапаров нар урт хугацааны найрсаг хөршийн харилцааны тухай хоёр талт гэрээнд гарын үсэг зуржээ.

Мөн талууд иж бүрэн стратегийн түншлэлийн харилцааг бэхжүүлэх хамтарсан тунхаглалыг баталгаажуулсан байна. Энэхүү баримт бичгүүд нь хоёр орны улс төр, эдийн засаг, соёлын салбарын хамтын ажиллагааг шинэ түвшинд гаргах эрх зүйн чухал үндэс суурь болж байгааг талууд тэмдэглэв.

Хоёр улсын хамтын ажиллагааны хамгийн том бодит илэрхийлэл нь Хятад-Киргиз-Узбекистаны (ХКУ) төмөр замын мега төсөл юм. Өдгөө тус төмөр замын барилгын ажил эрчимтэй үргэлжилж байгаа бөгөөд Хятадын "Guangxi Liugong Machinery" үйлдвэрлэгч компани Тянь-Шань нурууны далайн түвшнээс дээш 4000 метрийн өндөр уулын бүсэд цахилгаан хөдөлгүүртэй инженерийн болон уул уурхайн тусгай машин механизмуудыг байршуулан ажиллуулж байна. Эдгээр орчин үеийн тоног төхөөрөмжүүд нь байгаль цаг уурын хүнд нөхцөлд газар шорооны ажил болон төмөр замын суурь бүтцийг тавих ажлыг гүйцэтгэж байгаа бөгөөд энэ нь бүс нутгийн тээвэр, логистикийн сүлжээг шинэ шатанд гаргах чухал ач холбогдолтой юм.

Дээд хэмжээний уулзалтад оролцсон НҮБ-ын Ерөнхий нарийн бичгийн дарга Антонио Гутерриш ШХАБ-ын гишүүн орнуудад хандан үг хэлэхдээ олон улсын хамтын ажиллагааг бэхжүүлэхийг уриаллаа. Тэрээр дэлхийн засаглалын тогтолцоог шинэчлэх, уур амьсгалын өөрчлөлттэй тэмцэхэд шударга зарчим баримтлах, түүнчлэн хиймэл оюун ухааныг хөгжүүлэхэд баримтлах аюулгүй байдлын удирдамжийг боловсруулах шаардлагатайг онцлон тэмдэглэсэн юм. Энэ нь ШХАБ-ын олон улсын тавцан дахь нөлөө улам бүр өсөн нэмэгдэж байгааг илтгэж байна.

Бишкек хотноо зохион байгуулагдсан ШХАБ-ын 26 дугаар дээд хэмжээний уулзалт нь Төв Азийн бүс нутгийн тогтвортой байдал, эдийн засгийн интеграцчлалыг гүнзгийрүүлэхэд чухал түлхэц боллоо. Хятад-Киргиз-Узбекистаны төмөр замын бүтээн байгуулалт урагшилж, хоёр талын стратегийн түншлэл шинэ шатанд гарсан нь Киргиз Улсын бүс нутаг дахь геополитикийн болон эдийн засгийн байр суурийг улам бэхжүүлж байна. Цаашид тус улс нь Ази, Европыг холбосон тээврийн гол зангилаа болох зорилтоо амжилттай хэрэгжүүлэх суурь тавигдлаа.

Монгол улсын Ерөнхийлөгч Ухнаагийн Хүрэлсүх энэхүү уулзалтанд үг хэлэхдээ,  “Монгол Улс “энхийг эрхэмлэсэн, нээлттэй, бие даасан, олон тулгуурт” гадаад бодлогыг тууштай баримталдаг улс орны хувьд олон улсын харилцааг талцал хуваагдал руу чиглүүлэх бус, харин аливаа улс орны үүх түүх, соёл иргэншил, үндэсний язгуур эрх ашиг, хөгжлийн замналаас үүдэлтэй олон ургалч үзлийг хүндэтгэсэн олон тулгуурт зарчмаар цогцлоон хөгжүүлж, НҮБ-ын зорилго, олон улсын эрх зүй, тэгш эрх, харилцан хүндэтгэлд суурилсан шударга, хүртээмжтэй олон улсын дэг журмыг тууштай дэмждэг” гэдгээ илэрхийлсэн юм. Манай улс тус хуралдаанд ажиглагч орны байр сууринаас оролцлоо.