Монгол Улсын Ерөнхийлөгч У.Хүрэлсүх Хөвсгөл, Орхон, Булган аймагт ажиллана

Монгол Улсын Ерөнхийлөгч Ухнаагийн Хүрэлсүх орон нутгийн нийгэм, эдийн засгийн бодит нөхцөл байдал, бүсчилсэн хөгжлийн бодлогын хэрэгжилт болон намрын ургац хураалт, өвөлжилтийн бэлтгэл ажилтай танилцахаар Төвийн болон Хангайн бүсийн Хөвсгөл, Орхон, Булган аймгуудад 2026 оны аравдугаар сарын 2-3-ны өдрүүдэд ажиллана.

Аравдугаар сарын 2-ны өдөр Ерөнхийлөгч Хөвсгөл аймагт ажиллаж, бүс нутгийн онцлогт нийцсэн тогтвортой аялал жуулчлалыг хөгжүүлэх, Хөвсгөл нуурын байгалийн цогцолборт газрын экологийн тэнцвэрт байдлыг хамгаалах чиглэлээр авч хэрэгжүүлж буй арга хэмжээнүүдтэй танилцах төлөвтэй байна. Мөн "Тэрбум мод" үндэсний хөдөлгөөний хүрээнд тус аймагт хийгдсэн ойн нөхөн сэргээлт, ойн зурвас байгуулах ажлын үр дүнг үзэж сонирхоно. Үүний зэрэгцээ Мөрөн хотын Бөхийн өргөөнд нутгийн иргэд, төрийн албан хаагчид, малчид, хөдөлмөрчидтэй уулзаж, улс орны нийгэм, эдийн засгийн өнөөгийн байдал болон урт, дунд хугацааны хөгжлийн бодлогыг танилцуулан, санал хүсэлтийг нь сонсоно.

Аравдугаар сарын 3-ны өдөр Төрийн тэргүүн Орхон аймагт ажиллаж, Эрдэнэт хот дахь үйлдвэрлэл, технологийн паркийн бүтээн байгуулалт, уул уурхайн салбарын дэвшилтэт технологи нэвтрүүлэлт болон цаашдын өргөтгөлийн ажлуудтай танилцахаар төлөвлөжээ. Түүнчлэн "Эрдэнэт үйлдвэр" ТӨҮГ-ын "Cumo" аrena цогцолборт уурхайчид, инженер техникийн ажилтнууд, иргэдтэй уулзаж, хотын дэд бүтэц, гэр хорооллын дахин төлөвлөлт, ногоон хот байгуулалтын төслүүдийн явцыг шалгах юм.

Үргэлжлүүлэн Ерөнхийлөгч Булган аймагт ажиллаж, төвийн бүсийн газар тариалан, эрчимжсэн мал аж ахуйн салбарын нөхцөл байдал, намаржилтын үйл явц, өвөлжилтийн бэлтгэл ажилтай газар дээр нь танилцана. Энэ үеэр "Хүнсний хангамж, аюулгүй байдал" үндэсний хөдөлгөөний хүрээнд тус аймгийн тариаланчид, ногоочид, хүнс үйлдвэрлэгчдийг дэмжих, зоорь, агуулахын хүртээмжийг нэмэгдүүлэх чиглэлээр авч буй арга хэмжээний үр дүнг шалгахаар төлөвлөсөн байна.