Баян-Өлгий аймагт үүргэвчтэй аялал хийж явсан Австрали улсын эмэгтэйг хүчиндсэн этгээдийг баривчилжээ
Баян-Өлгий аймгийн Ногооннуур суманд явган аялал хийж байсан гадаадын иргэнийг хүчирхийлсэн хэрэг гарч, цагдаагийн байгууллагаас сэжигтнийг саатуулан шалгаж эхэллээ. Уг хэрэг энэ сарын 9-ний өдөр /2026.09.09/ гарсан бөгөөд хохирогч нь Австрали улсаас ирсэн 24 настай эмэгтэй жуулчин болохыг албаныхан тогтоосон байна. Цагдаагийн ерөнхий газраас уг хэргийн талаарх албан ёсны мэдээллийг есдүгээр сарын 13-ны өдөр олон нийтэд зарлаж, сэжигтнийг баривчлан мөрдөн байцаалтын ажиллагааг үргэлжлүүлж байгааг мэдэгдлээ.
Хохирогч эмэгтэй Баян-Өлгий аймгийн нутаг дэвсгэрт үүргэвчтэй аялал хийж, явган алхаж байхдаа замаар өнгөрөх тээврийн хэрэгсэлд дайгдсан байна. Улмаар тэрээр орон нутгийн нэгэн айлд хоноглохоор үлдсэн бөгөөд энэ үеэр хамт зорчиж явсан согтууруулах ундаа хэрэглэсэн эрэгтэй түүнийг хүчирхийлжээ.
Хохирогч эмэгтэй болсон явдлын дараа хууль хяналтын байгууллагад албан ёсоор гомдол гаргасан аж. Хэрэг гарах үед сэжигтэн этгээд согтууруулах ундаа хэрэглэсэн байсан нь тогтоогдсон бөгөөд тэрээр хохирогчтой нэг тээврийн хэрэгслээр хамт зорчиж ирсэн байжээ.
Одоогийн байдлаар сэжигтнийг саатуулан байцааж байгаа бөгөөд хэргийн баримт материалыг бүрдүүлэх ажил үргэлжилж байна.
Хууль хяналтын байгууллагын зүгээс гадаадын жуулчдын аюулгүй байдлыг хамгаалах, гэмт хэргээс урьдчилан сэргийлэх чиглэлээр орон нутгийн засаг захиргааны байгууллагуудтай хамтран ажиллахаа илэрхийллээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү. Ёс бус сэтгэгдлийг админ устгах эрхтэй. Мэдээний сэтгэгдэлд Reelnews.mn хариуцлага хүлээхгүй.
Одоогоор сэтгэгдэл байхгүй байна. Та анхны сэтгэгдлийг бичээрэй.