Монголын нэрээр оролцож буй Хятад миссийн асуудал: Amber Yuhan хэн бэ?

Miss Grand International 2026 тэмцээний албан ёсны цахим хуудсанд Монгол Улсыг төлөөлөгчөөр Amber Yuhan нэртэй оролцогч бүртгэгдсэн нь олон нийтийн анхаарлыг татаж, түүний иргэншил болон Монголыг төлөөлөх эрхийн асуудал шуугиан тариад буй.

Тэгвэл Amber Yuhan гэж хэн бэ?

Miss Grand International-ийн албан ёсны танилцуулгад Amber Yuhan өөрийгөө гоо сайхны бизнес эрхлэгч гэж тодорхойлсон байна. Тэрээр 177 сантиметр өндөртэй бөгөөд өмнө нь хэд хэдэн гоо сайхны тэмцээнд оролцож байсан, мөн эмэгтэйчүүдийн эрх мэдэл, өөртөө итгэх итгэлийг дэмжихийг зорьдог хэмээн танилцуулгадаа бичсэн байна. Түүний танилцуулгад спортын ур чадварыг онцолсон ч боловсрол, төрсөн огноо, иргэншлийн талаар дэлгэрэнгүй мэдээлэл нийтлээгүй байна. Харин Монголын хэвлэлүүд түүнийг 24 настай, Хятад улсын иргэн гэж мэдээлсэн билээ.

Тэрээр Тайландад зохион байгуулагдаж буй Miss Grand International 2026 тэмцээнд Монгол Улсын нэр, төрийн далбаа бүхий танилцуулгатайгаар оролцсон дуулиан шуугианы бай болоход хүргэсэн. Тэмцээний албан ёсны оролцогчдын жагсаалтад “Mongolia — Amber Yuhan” гэж бүртгэгдсэн бөгөөд түүний тусгай танилцуулгын хуудсанд мөн Монгол Улсыг төлөөлж буйгаар тэмдэглэжээ.

Олон нийтийн мэдээллээр Amber Yuhan өмнө нь Miss Grand China-тай холбоотой тэмцээнд оролцож тус тэмцээний титэмт оролцогчоор танилцуулагдаж байсан гэх мэдээлэл гарсан.

Монголыг төлөөлөх эрхийг хэн олгосон бэ?

Одоогоор Amber Yuhan-ыг Монгол Улсыг төлөөлүүлэхээр хэн сонгосон, ямар шалгаруулалтаар сонгосон, Монголын эрхийг эзэмшигч ямар байгууллага түүнд зөвшөөрөл олгосон талаар олон нийтэд тодорхой албан тайлбар гараагүй байгаа юм.  

Топ модель, “ANDRA Academy”-ийн үүсгэн байгуулагч Х.Бадамгэрэл энэ асуудлаар Miss Grand International-ийн зохион байгуулагчдад хандаж, түүний Монгол Улсын иргэн мөн эсэх, Монголыг төлөөлөх хууль ёсны үндэслэлтэй эсэх, сонгон шалгаруулалтыг ямар журмаар хийсэн болон Монголын тэмцээний лицензийг хэн эзэмшдэг талаар тайлбар шаардаад буйгаа өнөөдөр мэдэгдсэн.

Гэхдээ энд нэг чухал ялгааг тодруулах шаардлагатай. Олон улсын гоо сайхны тэмцээний “улсыг төлөөлөх” эрх нь заавал төрийн байгууллагын томилгоо гэсэн үг биш бөгөөд тухайн тэмцээний үндэсний лиценз эзэмшигч, зохион байгуулагчийн сонгон шалгаруулалтаар олгогддог тохиолдол бий. Гэхдээ энэ тохиолдолд яг ямар байгууллага, ямар гэрээний үндсэн дээр Amber Yuhan-ыг Монголын төлөөлөгчөөр бүртгүүлсэн нь одоогоор тодорхой бус байна.