Орон сууцны давхар борлуулалтыг таслан зогсоох хуулийн шинэчлэл хийнэ

Улсын Их Хурлын намрын ээлжит чуулганаар орон сууц захиалгын залилангаас сэргийлэх, иргэдийн өмчлөх эрхийг хамгаалах зорилгоор Эд хөрөнгийн эрхийн улсын бүртгэлийн ерөнхий хуульд нэмэлт, өөрчлөлт оруулах тухай хуулийн төслийг нэн тэргүүнд хэлэлцэхээр болсон. Чуулганы нээлтийн үеэр Улсын Их Хурлын дарга С.Бямбацогт хэлсэн үгэндээ барилгын салбар дахь нэг орон сууцыг олон дахин давхардуулан борлуулах хууль бус үйлдлийг таслан зогсоох нь иргэдийн эрх ашгийг хамгаалахад чухал ач холбогдолтойг онцлон тэмдэглэж байв.

Албан ёсны тоон мэдээллээр барилга ашиглалтад орохоос өмнө орон сууц захиалгын гэрээ байгуулсан иргэд залилан мэхлэх гэмт хэрэгт өртөж, их хэмжээний санхүүгийн хохирол амссан тохиолдол гарсаар байна. Тухайлбал, энэ төрлийн үйлдлийн улмаас 3,111 иргэн хохирч, нийт 107.7 тэрбум гаруй төгрөгийн санхүүгийн алдагдал хүлээжээ. Иймд холбогдох хуульд өөрчлөлт оруулснаар дуусаагүй барилгын бүртгэлийг нарийвчлан, нэг орон сууцыг давхардуулан борлуулах эрсдэлийг таслан зогсоох эрх зүйн баталгаа бүрдэх юм.

Хууль тогтоох байгууллагын удирдлагын зүгээс иргэдийн эрх ашгийг хамгаалах, хуулийн засаглалыг бэхжүүлэх хүрээнд хэд хэдэн тодорхой алхмыг хэрэгжүүлж байна. Үүний хүрээнд чанаргүй зээлдэгчдийн санхүүгийн "хар жагсаалт"-тай холбоотой асуудлыг эргэн нягталж, иргэд болон аж ахуйн нэгжүүдийн гомдлыг шийдвэрлэх 30 хоногийн хугацаатай үүрэг, чиглэл өгчээ. Мөн Parliament.mn болон e-Mongolia системд суурилсан "Нээлттэй парламент" санаачилгын хүрээнд улсын төсөв, хууль тогтоох үйл явцын мэдээллийг олон нийтэд нээлттэй, ил тод хүргэхээр ажиллаж байна.

Түүнчлэн парламентын дотоод чадавхыг сайжруулах зорилгоор Улсын Их Хурлын даргын хууль зүйн бодлогын зөвлөх Н.Отгончимэг тэргүүтэй төлөөлөгчид Шүүхийн сахилгын хороотой зөвлөлдөх уулзалт хийж, шүүхийн ёс зүй болон эрх зүйн шинэчлэлийн асуудлаар санал солилцжээ. Мөн Улсын Их Хурлын Тамгын газар, Парламентын судалгаа, хөгжлийн хүрээлэн болон гишүүдийн зөвлөхүүдийн бүрэлдэхүүнтэй уулзалт зохион байгуулж, байгууллагын дотоод ажиллагааг бэхжүүлэх чиглэлийг хэлэлцсэн байна. Эд хөрөнгийн бүртгэлийн тогтолцоог эрх зүйн хувьд чангатган, цахим хяналтад оруулснаар орон сууцны залилангаас урьдчилан сэргийлж, иргэдийн эд хөрөнгө, санхүүгийн аюулгүй байдлыг урт хугацаанд хамгаалах боломж бүрдэнэ гэж үзэж байна.