Х.Булгантуяа: Мега төслүүдээ улсын төсвөөс, зам талбайн тохижилтыг орон нутгаас нь санхүүжүүлдэг байхаар ялгаж тогтоовол цаашид маргаан гарахгүй

Төрийн ордонд нийслэлийн төсвийн сонсгол хоёр дахь өдрөө үргэлжилж, Туулын хурдны зам болон Сэлбэ дэд төвийн төслийн талаар хэлэлцлээ. Тус сонсголд УИХ-ын гишүүн Х.Булгантуяа шүүмжлэлтэй байр суурьтай оролцож, сонсголын зохион байгуулалт, үр дүн болон төсвийн шинэчлэлийн талаар мэдээлэл өглөө.

Тэрбээр сонсголыг санаачилсан гишүүдийн ирц хангалтгүй байгааг онцлов. Өнгөрсөн тавдугаар сарын 1-нд 25 гишүүн гарын үсэг зурж сонсгол хийхээр өргөн барьсан ч өнгөрсөн хоёр хоногийн хугацаанд дөнгөж 7-8 гишүүн л оролцсон байна. Энэ нь ажил төрлөө хойш тавин ирж, өглөө ирц бүрдэхийг 2-3 цаг хүлээсэн 60-70 төрийн албан хаагчийг үл хүндэтгэсэн үйлдэл гэдгийг санууллаа. Мөн мэдээлэл хийх ёстой зарим албан тушаалтан ирээгүйг шүүмжилж, санаачлагчид өөрсдөө ач холбогдол өгч, идэвхтэй оролцох ёстойг тодотгов.

Сонсголоор танилцуулж буй шинжээчдийн дүгнэлтийн тухайд хэт богино хугацаанд хийгдсэн гэж үзэж байгаагаа илэрхийллээ. 10 гаруй мега төслийн хэдэн боть баримт бичгийг хоёрхон долоо хоногт судалж, өндөр чанартай дүгнэлт гаргах боломжгүйг тэрбээр хэлэв. Түүнчлэн УИХ-ын гишүүд шүүх, хуулийн байгууллага шиг ажиллах эрхгүй бөгөөд хууль зөрчсөн асуудал байвал АТГ болон хууль хяналтын байгууллагууд шалгаж тогтоох ёстойг сануулсан юм. Харин УИХ-ын зүгээс хэдэн улстөрч нийлж суугаад мэргэжлийн бус дүгнэлт гаргахын оронд цаашид юунд анхаарах талаар мэргэжлийн байгууллагын дүгнэлтэд үндэслэсэн зөвлөмж гаргах нь зүйтэй гэв.

Мөн төсвийн реформ хийх цаг болсныг УИХ-ын гишүүн Х.Булгантуяа онцоллоо. Улсын болон орон нутгийн төсвөөс юуг нь санхүүжүүлэх вэ гэдгийг маш тодорхой зааглах шаардлагатай байна. Тухайлбал, мега төслүүдээ улсын төсвөөс, зам талбайн тохижилтыг орон нутгаас нь санхүүжүүлдэг байхаар ялгаж тогтоовол цаашид маргаан гарахгүй гэдгийг хэлэв. Сүүлийн жилүүдэд улсын төсөвт орлого төвлөрүүлдэг аймгийн тоо нэмэгдэж, орон нутаг эдийн засгийн хувьд бие дааж байгаа энэ үед хяналтын механизмыг сайжруулахгүй бол дараа дараагийн орон нутагт ч ийм асуудал үүсэх эрсдэлтэйг анхаарууллаа.

Эцэст нь тэрбээр энэхүү сонсгол зүгээр нэг яриад өнгөрдөг биш, бодитой үр дүнд хүрэх ёстойг санууллаа. Хуулийн байгууллага шалгаж байгаа, царцаасан төслүүд болон прокурорын дүгнэлт гарсан асуудлуудад сонсголоор нөлөөлөх боломжгүй. Харин Сангийн яам бодлогын шинэчлэл хийж, УИХ-аас хуулийн өөрчлөлт, тодорхой зөвлөмжүүд гарган түүнийгээ хэрэгжүүлж ажиллах нь энэ удаагийн сонсголын гол үр дүн байх ёстойг илэрхийллээ.