NASA сарны Artemis хөтөлбөрийн нислэгийн хуваарьт томоохон өөрчлөлт орууллаа

АНУ-ын Сансар судлал, сансрын удирдлагын газар (NASA) сар руу хүн илгээх "Artemis" хөтөлбөрийнхөө бүтцэд томоохон өөрчлөлт оруулж, дараагийн шатны сансрын хөлгүүдийн нислэгийн хуваарийг шинэчлэн баталлаа. Тус агентлагийн удирдлагаас технологийн эрсдэлийг бууруулах, нислэгийн давтамжийг нэмэгдүүлэх зорилгоор хөтөлбөрийн замын зургийг ийнхүү өөрчилсөн байна. Шинэчилсэн төлөвлөгөөний дагуу өмнө нь саран дээр буух зорилготой байсан "Artemis III" хөлгийг дэлхийн нам дор тойрог замд туршилт хийх нислэг болгон өөрчилж, харин "Artemis IV" хөлгийг саран дээр хүн буулгах нислэг болгохоор шийдвэрлэжээ.

"Artemis III" хөлгийг 2027 оны дунд үед хөөргөх бөгөөд шинэчилсэн бүтцийн дагуу сансрын нисгэгчид саран дээр буухгүй бөгөөд дэлхийн нам дор тойрог замд хоёр долоо хоногийн турш өндөр эрсдэлтэй залгалт, ойртох ажиллагааны туршилтуудыг гүйцэтгэх аж. Туршилтын үеэр "Orion" хөлөг "SpaceX" компанийн "Starship HLS" болон "Blue Origin" компанийн "Blue Moon" зэрэг хувийн саран дээр буугч системүүдийн туршилтын хувилбаруудтай холбогдох аж. Тус нислэгийн багийн бүрэлдэхүүнд дарга Рэнди Бресник, нисгэгч Лука Пармитано, даалгаврын мэргэжилтэн Фрэнк Рубио болон Андре Дуглас нар томилогджээ.

Үүний үр дүнд сарны өмнөд туйлд 2028 оны эхээр "Artemis IV" хөлөг саран дээр бууна. Тус нислэгээр дөрвөн сансрын нисгэгч сар руу нисч, тэдний хоёр нь "SpaceX" эсвэл "Blue Origin" компанийн хөгжүүлсэн буугч систем рүү шилжин, сарны урьд өмнө хүн хөл тавиагүй өмнөд туйлын бүсэд газардах юм. Үүний дараа 2028 оны сүүлчээр "Artemis V" хөлгийг хөөргөхөөр төлөвлөж байгаа бөгөөд энэ нь сарны гадаргуу дээр шинжлэх ухааны судалгаа хийх, дээж цуглуулах, мөн байнгын бааз байгуулах суурийг тавих дараагийн шатны нислэг болох ажээ.

Хөтөлбөрийн бэлтгэл ажлын хүрээнд Флорида дахь Кеннедийн нэрэмжит сансрын төвд "Artemis III" хөлгийн техник хангамжийг угсрах ажил эрчимтэй үргэлжилж байна. Инженерүүд "Orion" хөлгийн багийн болон үйлчилгээний модулиудыг амжилттай холбож дуусгасан бөгөөд удахгүй нэгдсэн туршилтуудыг эхлүүлэхээр бэлтгэж байгаа аж. Мөн "Space Launch System" пуужингийн хос хурдасгуурын хэсгүүдийг угсрах ажил эхэлсэн байна. Түүнчлэн NASA "Orion" хөлгийг бодит цагийн, өндөр нягтралтай лазер дүрслэл болон өгөгдөл дамжуулах боломжоор хангахын тулд "SpaceX" компанийн "Starlink" мини лазер холбооны терминалуудыг ашиглахаар болжээ.

NASA сарны хөтөлбөрийнхөө бүтцийг ийнхүү шинэчилсэн нь сансрын урт хугацааны хайгуул судалгааг илүү тогтвортой, эрсдэл багатай бөгөөд эдийн засгийн хувьд үр ашигтай болгох стратегийн чухал алхам болж байна. Мөн нислэгийн давтамжийг тогтворжуулж, техник хангамжийг стандартчилснаар хүн төрөлхтөн сар, цаашлаад Ангараг гараг руу аялах урт хугацааны зорилтоо илүү бат бөх суурьтайгаар хэрэгжүүлэх боломж бүрдэж байгааг салбарынхан онцолж байна.