Танилц: Бороотой өдөрт сонсоход тохиромжтой сонгодог хөгжмийн таван бүтээл

Хур бороотой зуны өдрүүд үргэлжилж байна. Ийм үед сонсоход тохиромжтой сонгодог хөгжмийн таван бүтээлийг манай редакцын зүгээс санал болгож байна: 

1. Фредерик Шопен  (Raindrop Prelude, Op. 28, No. 15)   ​Хэдийгээр энэ нь бүрэн хэмжээний симфони биш, төгөлдөр хуурын гоцлол бүтээл боловч бороотой өдөр хамгийн түрүүнд санаанд ордог суут бүтээл юм. ​Шопен энэхүү бүтээлээ "Майорка" арал дээр бороо орж байх үед бичсэн гэдэг. Эхлэл хэсэг нь намуухан, гунигтай ч дунд хэсэгтээ хүнд, нүсэр болж хувирдаг нь аянга нижигнэсэн ширүүн бороог заримдаа санагдуулдаг.
2. Людвиг ван Бетховены зургаадугаар симфони (Symphony No. 6 "Pastorale")   ​Бетховений байгаль дэлхий, хөдөөх тосгоны амьдралыг магтан дуулсан алдартай симфони. ​Энэхүү симфони нь таван бүлэгтэй бөгөөд дөрөвдүгээр бүлэг нь "Аянгат шуурга" (Thunderstorm) нэртэй. Хөгжмийн зэмсгүүд бага багаар чангарсаар аянга цахиж, ширүүн бороо орж буйг гайхалтай амьд  мэт дүрсэлдэг. Харин үүний дараах тавдугаар бүлэгт шуурга намдаж, байгал дэлхий сэргэж буйг маш уянгалаг, тайван хэмнэлээр илэрхийлдэг тул борооны дараа сонсоход нэн тохиромжтой.
3. Иоханнес Брамсын гуравдугаар симфони, (Symphony No. 3, 3rd Movement: Poco Allegretto) ​ Брамсын хамгийн уянгалаг, сэтгэл хөдөлгөсөн, бага зэрэг гунигтай аялгуу эндээс эгшиглэдэг. ​Энэхүү бүлэг нь хэтэрхий нүсэр биш бөгөөд зөөлөн, намуухан хэмнэлтэй. Бороотой өдрийн таатай хэрнээ бага зэрэг дурсамж сэргээсэн, гунигтай мэдрэмжийг энэ аялгуу төгс илэрхийлж чаддаг. Маш олон кино, жүжгийн хөгжимд ашиглагдсан байдаг.
4. Петр Ильич Чайковскийн нэгдүгээр симфони  (Symphony No. 1 "Winter Daydreams") ​Нэр нь өвөл боловч Орос орны уудам газар нутаг, манан, хур тунадастай өдрүүдийн уур амьсгалыг гайхалтай шингээсэн бүтээл. ​Чайковскийн анхны томоохон симфониудын нэг бөгөөд гүн бодлогошрол, гуниглалын өнгө аястай. Бороо орсон, манан татсан, саарал өдрүүдэд гэрээсээ гаралгүй, цонхоор ширтэж суух үеийн дотоод сэтгэлийн хөдөлгөөнийг хөгжмийн нотуудаар маш тансаг зурсан байдаг
5. Антонио Вивальди "Улирлууд" симфоний "Зун" хэмээх бүлэг (The Four Seasons: Summer - III. Presto) ​ Хэрэв та бороотой өдөр унтаж, амрахыг биш, харин ч эрч хүч авч, байгалийн сүр хүчийг мэдрэхийг хүсэж байвал энэ хөгжим яг тохирно. ​Вивальдигийн "Зун" концертын гуравдугаар бүлэг (Preсто) нь зуны бүгчим өдрийн дараа гэнэт асгарах ширүүн аянгат бороо, шүүдрийн гялбааг хийлийн маш хурдан, галзуу мэт хэмнэлээр дүрсэлдэг.