Ш.Энхийн-Одын “NBA"-ын зуны лигийн хүрээнд тоглох гэж буй ”Орландо Межик” багийн тухай сонирхолтой найман баримтыг хүргэж байна

Үндэсний Сагсан Бөмбөгийн Холбооны (NBA) хамгийн сонирхолтой түүхтэй багуудын нэг болох Орландо Мэжик (Orlando Magic) багийн тухай найман сонирхолтой баримтыг хүргэж байна. ​

"Орландо Межик" нэрийн тухайд

​Багийн нэрийг оноохын тулд 1986 онд сониноор дамжуулан уралдаан зарлаж, 4300 гаруй саналаа ирүүлж байжээ. Эцэст нь Heat, Tropics, Juice болон Magic гэсэн дөрвөн нэр тунаж үлдсэн байна. Тухайн үед багийн ерөнхий менежер байсан Пат Уильямсын долоон настай охин Орландод зочилчихоод буцахдаа "Энэ хот яг л ид шидтэй юм шиг байна" гэж хэлсэн нь "Мэжик" нэрийг сонгох гол шалтгаан болжээ. Орландод алдарт Disney World байдаг бөгөөд үүнтэй ч энэ нэр гайхалтай зохицдог. ​

Самбар эвдэгч Шакил О'Нил ​

1992 онд "Орландо Мэжик" баг драфтын тэргүүн сонголтоор домогт төвийн тоглогч Шакил О'Нилийг авсан юм. Шак "шинэ цэрэг" байхдаа дэндүү хүчтэй, хүнд жинтэй байсан тул тоглолтын үеэр сагсны арын шилэн самбарыг хоёр ч удаа үйртэл нь хагалж байв. Үүнээс болж NBA сагсны тулгуур, бүтцийг илүү бат бөх болгож шинэчлэхээс өөр аргагүйд хүрсэн түүхтэй. ​

Богино хугацаанд Финалд хүрсэн замнал ​

Тэд 1989 онд лигт элссэн бөгөөд үүнээс ердөө зургаан жилийн дараа буюу 1995 онд Шакил О'Нил, Пенни Хардауэй нарын хослолын ачаар NBA-гийн Финалд шалгарч чадсан юм. Энэ нь шинэ багуудын хувьд дэндүү хурдан хугацаанд үзүүлсэн гайхалтай амжилт байлаа. ​

Домогт Майкл Жорданыг зогсоосон нь ​

1995 оны дорнод бүсийн хагас шигшээд Орландо Мэжик баг Майкл Жорданы Чикаго Буллз багийг цувралд 4-2 харьцаагаар хожиж байв. Энэ нь Майкл Жорданы хувьд 1990-ээд оноос аваргалж эхэлснээсээ хойш "плей-оффт" цувралаар хожигдсон цорын ганц тохиолдол болж түүхэнд үлдсэн юм.

​Үүрдийн "6" дугаар ​

"Орландо Мэжик" багт 6 дугаартай тамирчин талбайд тоглодоггүй. Учир нь тэд энэ дугаарыг өөрийн үнэнч хөгжөөн дэмжигчдэдээ (сагсан бөмбөгийн талбай дээрх зургаа дахь тоглогч гэдэг утгаар) зориулж, хэний ч өмсөхгүй "мөнхийн дугаар" болгон ордондоо залсан юм. ​

"Супермэн" хочит Дуайт Ховард

2004 оны драфтын тэргүүн сонголтоор ирсэн Дуайт Ховард багийг дараагийн алдар хүндэд хөтөлсөн юм. Тэрээр 2008 оны "Бүх оддын тоглолт"-ын цагираган дээрээс довтлох (Slam Dunk) тэмцээнд супермэний нөмрөг өмсөж орсноороо алдартай. Ховард Мэжик багийг 2009 онд хоёр дахь удаагаа NBA-ын финалд үлдээж байв. ​

Бүх цаг үеийн оновчтой дамжуулалтын рекорд

​NBA-ынн нэг тоглолтод хамгийн олон оновчтой дамжуулалт (assist) өгсөн түүхэн рекорд Орландо Мэжик багийн нэр дээр байдаг. 1990 оны арванхоёрдугаар дугаар сарын 30-нд Скотт Скайлс Денвер Наггетс багийн эсрэг тоглохдоо 30 оновчтой дамжуулалт өгсөн нь өнөөг хүртэл эвдэгдээгүй байна. ​

Шинэ эрин үе ба Паоло Банкеро ​

Орландо Мэжик баг одоо маш залуу, ирээдүйтэй бүрэлдэхүүнтэй болоод байна. Үүний тод жишээ нь 2022 оны драфтын тэргүүн сонголт Паоло Банкеро (Paolo Banchero) юм. Тэрээр ирсэн даруйдаа "Оны шилдэг шинэ тоглогч" (Rookie of the Year) болж, багийг дахин лигийн хүчирхэг өрсөлдөгчдийн эгнээнд авч ирээд байна.