Ормузын хоолойг дамжин өнгөрч байсан гурван хөлөг онгоц руу халдсаны хариуд АНУ Иранд шинээр цохилт өглөө

АНУ-ын Зэвсэгт хүчин Ормузын хоолойгоор дамжин өнгөрч байсан арилжааны гурван хөлөг онгоц руу Ираны талаас халдсаны хариуд Ираны нутаг дэвсгэр дэх хэд хэдэн байгууламжид агаарын цохилт өгсөн байна. Энэ нь өнгөрсөн сарын сүүлчээс хойш АНУ-аас Ираны эсрэг хийж буй анхны томоохон цэргийн ажиллагаа болж байна.

АНУ-ын Төв командлалын (CENTCOM) мэдээлснээр, цохилтууд нь Ираны агаарын довтолгооноос хамгаалах систем, эргийн ажиглалтын цэгүүд, газраас агаар ангиллын пуужингийн систем, түүнчлэн хөлөг онгоцны эсрэг далавчит пуужин болон нисгэгчгүй нисэх төхөөрөмж (дрон) хөөргөх талбайнуудыг чиглэсэн байна. Мөн Ираны боомтын байгууламжууд цохилтод өртжээ.

Ираны өмнөд хэсэгт орших Сирик хотын Тахеруи боомтын орчимд зургаан пуужин унаж, Бандар Аббас болон Сирик дэх загас агнуурын зогсоолууд цохилтод өртсөн байна. Үүний улмаас хэд хэдэн иргэний загас агнуурын завь шатсан бөгөөд хэлтэрхийд өртөж хэдэн хүн шархадсан ч энгийн иргэдийн амь нас хохироогүй гэж Ираны төрийн телевиз мэдээлэв.

АНУ-ын албаны хүний мэдээлснээр, Иран улс Ормузын хоолойг хяналтдаа байлгах замаар дэлхийн хамгийн хүчирхэг зэвсэгт хүчинтэй мухардалд орох хөшүүрэг болгон ашиглаж байна. Тегеран урт хугацааны энхийн хэлэлцээр байгуулах явцдаа өөрийн байр сууриа бэхжүүлэхийн тулд хөлөг онгоцууд руу халдах аргыг хэрэглэдэг гэж шинжээчид үзэж байна.

Өнгөрсөн сард АНУ болон Ираны хооронд байгуулагдсан Исламабадын санамж бичиг нь Ормузын хоолойгоор аюулгүй, татваргүй нэвтрэх эрхийг 60 хоногийн хугацаанд баталгаажуулсан байсан юм. Гэвч Иран улс тус хоолойгоор дамжин өнгөрөх хөлөг онгоцуудаас хураамж авах, зөвшөөрөл шаардах зэргээр хяналтаа тогтоохыг оролдсоор иржээ.

Катар улс өөрийн "Al Rekayyat" танкер руу дрон халдлага үйлдсэнд Ираныг буруутгаж, Ираны Элчин сайдын яамны төлөөлөгчийг дуудаж эсэргүүцлийн нот бичиг гардуулсан байна. Харин Ираны тал Катарын буруутгалыг няцааж, Ирантай зөвшилцөөгүй замаар явсан хөлөг онгоцууд эрсдэлд орно гэдгийг анхааруулжээ.

АНУ-ын Ерөнхийлөгч Дональд Трамп одоогоор Турк улсад айлчилж байгаа бөгөөд Анкара дахь НАТО-гийн дээд хэмжээний уулзалтын өмнө Туркийн удирдагч Режеп Тайип Эрдогантай уулзсан байна. Трамп зарим НАТО-гийн холбоотнууд Ираны эсрэг дайнд нэгдэхээс татгалзсанд сэтгэл дундуур байгаагаа илэрхийлжээ. Тэрээр өмнө нь Ирантай тохиролцоонд хүрэхгүй бол цэргийн ажиллагааг дуусгах болно гэдгээ мэдэгдэж байсан юм.

Одоогоор Ираны өмнөд хэсэгт, тэр дундаа Кешм арал болон Харг арал орчимд дэлбэрэлтүүд үргэлжлэн сонсогдож байгаа бөгөөд нөхцөл байдал улам хурцдаж байна.

Эх сурвалж: theguardian.com